17 قىركۇيەكتە الماتى قالاسىندا Almaty Urban Fest 2022 ۋربانيستىك جانە ەكسترەمالدى سپورت تۇرلەرى فەستيۆالىنىڭ گراند-فينالى وتەدى.
بۇعان دەيىن 27 تامىز كۇنى 10 سپورت تۇرىنەن ىرىكتەۋ تۋرلارى ءوتىپ، جارىسقا 1100-دەن استام ادام قاتىستى، دەپ حابارلايدى Almaty-akshamy.kz Olympic.kz-كە سىلتەمە جاساپ.
«الماتى ارەنا» سپورت كەشەنىندە جارىستىڭ شەشۋشى كۇنى جۇلدەلى ورىنعا جاس سكەيتەرلەر، روللەرلەر، ساموكاتشىلار، BMX سايىپقىراندارى، باسكەتبولشىلار، بيشىلەر، ارمرەستلينگ پەن ۆوركاۋت شەبەرلەرى، ترەيسەرلەر مەن Dota 2 بويىنشا كيبەرسپورتشىلار جۇلدەلى ورىنعا تالاسادى. گراند-فينال جارىسىندا جالپى سانى 500-گە جۋىق سپورتشى ب ا ق سىنايدى.
بيىل Almaty Urban Fest ءىس-شاراسى الماتى قالالىق سپورت باسقارماسىنىڭ باستاماسىمەن ءۇشىنشى رەت ۇيىمداستىرىلىپ وتىر. ماقساتى – جاستار اراسىندا تانىمال زاماناۋي سپورت تۇرلەرىن قولداۋ جانە دامىتۋ. فەستيۆال باعدارلاماسى 2019 جانە 2021 جىلدارمەن سالىستىرعاندا ىرىكتەۋ تۋرلارى، سونداي-اق كيبەرسپورت جانە پاركۋر سىندى سپورت تۇرلەرى ارقىلى كەڭەيدى.
شاراعا قاتىسۋشىلار مەن قوناقتار فينال كۇنى ارت-ينستاللياسيا كەشتەرى مەن شىعارماشىلىق بايقاۋلاردى تاماشالاي الادى. جارىس اياقتالعان سوڭ كورەرمەندەردى مەرەكەلىك باعدارلاما كۇتەدى.
گراند-فينال ساعات 9:00-دە باستاۋ الىپ، جەڭىمپازدار مەن جۇلدەگەرلەردى ماراپاتتاۋ ءراسىمى 18:30-دا وتەدى. جانكۇيەرلەر مەن قاتىسۋشىلارعا ارنالعان مەرەكەلىك باعدارلاما 20:00-دە باستالادى. فەستيۆالعا كىرۋ تەگىن.