جىلدامدىق جانە جالعا الۋ جاسى شەكتەلدى
قالا تۇرعىندارىنىڭ ەلەكتر ساموكاتتارىنىڭ رەتتەلمەيتىن قوزعالىسى مەن ولاردى پايدالانۋدىڭ، سونىڭ ىشىندە تۇراققا قويۋدىڭ ناقتى ەرەجەلەرىنىڭ جوقتىعىنا قاتىستى كوپتەگەن شاعىمدارىنا بايلانىستى الماتى اكىمدىگى ەلەكتر ساموكاتتارىن جالعا بەرۋ سەرۆيستەرىنىڭ قىزمەتىن رەتتەۋ جونىندە باستاما كوتەردى، دەپ حابارلايدى Almaty-akshamy.kz الماتى قالاسى اكىمدىگىنە سىلتەمە جاساپ.
ناتيجەسىندە الماتى ەلەكتر ساموكاتتارىن جالعا الۋ نارىعىنىڭ 100%-ىن الاتىن 4 ءىرى كومپانيانىڭ وكىلدەرىمەن كەزدەسۋلەر ءوتتى. تالقىلاۋ بارىسىندا قالا تۇرعىندارىنىڭ مۇددەسى ءۇشىن الماتىدا جول قوزعالىسىنا قاتىسۋشىلاردىڭ قاۋىپسىزدىگىن قامتاماسىز ەتۋگە قاتىستى مەموراندۋم جاسالدى.
مەموراندۋمعا سايكەس، قالادا ەلەكتر ساموكاتتاردىڭ جىلدامدىعى قوسىمشالاردىڭ كومەگىمەن 25 كم/ساع دەيىن شەكتەلەدى، جاسقا قاتىستى تالاپتار كۇشەيتىلەدى – ەلەكتر ساموكاتتاردى تەك 16 جاستان اسقان ادامدار عانا جالعا الا الادى.
وپەراتورلار ەلەكتر ساموكاتتاردىڭ مەترو كىرەبەرىستەرىنىڭ، قوعامدىق عيماراتتاردىڭ جانىندا، گازونداردا، قوزعالىس جانە جاياۋ جۇرگىنشىلەر بولىكتەرىندە تىكەلەي جاقىن بولماۋىن قاداعالايتىن بولادى. سونداي-اق، قالادا ارنايى اۆتوتۇراقتار جاسالادى. كەلەسى جىلدىڭ سوڭىنا دەيىن قالادا 3000 تۇراق ورنىن جابدىقتاۋ جوسپارلانۋدا.
جاڭا ەرەجەلەر مەموراندۋمعا قول قويىلعان ساتتەن باستاپ ءبىر اي ىشىندە – اعىمداعى جىلدىڭ 15 تامىزىنا دەيىن كۇشىنە ەنەدى.
ەسكە سالساق، ساموكاتتاردى جالعا بەرۋ قىزمەتى الماتىدا 2018 جىلدان باستاپ قولعا الىندى. قازىرگى ۋاقىتتا نارىقتا 15 مىڭ ەلەكتر ساموكاتىن جالعا بەرەتىن 4 كومپانيا (Sym، Jet، Eleven، Whoosh) جۇمىس ىستەيدى. بۇگىنگى تاڭدا قالادا كۇن سايىن ەلەكتر ساموكاتتارمەن 100 مىڭعا جۋىق جول قوزعالىسى جاسالادى.