«ەل ەرتەڭى» قوعامدىق قورىنىڭ وكىلدەرى وزدەرىنىڭ باسپا ءسوز كونفەرەنسياسىندا جاستاردى سايلاۋ ۇردىسىنە بەلسەنە قاتىسۋعا شاقىردى.
بريفينگ سپيكەرلەرى – ساياساتتانۋشى، تاريحشى تالعات جانىسباي، بلوگەر جانە ساياسي بەلسەندى ازامات جولدانبايەۆ پەن جۋرناليست ءارى اۋدارماشى اناستاسيا ۋلچەنكو شتاب قىزمەتى مەن تاۋەلسىز باقىلاۋشىلار پۋلىن قۇرۋ باستالعانىن مالىمدەپ، وي-تۇجىرىمدارىمەن ءبولىستى.
– تاريحقا كوز جۇگىرتسەك، اتا-بابالارىمىز دا باس قوسىپ، جينالىس-جيىنداردا ءوز كوشباسشىلارىن سايلاپ وتىرعان. سايلاۋ – مەملەكەت پەن حالىق اراسىنداعى كوپىر ىسپەتتى.الداعى سايلاۋدا اشىقتىق پەن ادىلدىكتى قامتاماسىز ەتۋ ءۇشىن ءبىز وسى جۇمىستى ۇيىمداستىرىپ، سايلاۋ ءۇردىسىن باقىلاۋعا قاتىسۋعا شەشىم قابىلدادىق. ءبىزدىڭ باستى ماقساتىمىز – جاستارىمىزدى بۇل جۇمىسقا كوپتەپ تارتۋ، ولاردىڭ بەلسەندىلىگىن ارتتىرۋ جانە ساياسي ساۋاتتىلىعىن كوتەرۋ. جاقىن ارادا ءبىز بايقاۋشىلاردىڭ ساپالى توبىن قۇرىپ، ولاردىڭ بىلىكتى ءدارىس الۋىن ۇيىمداستىرۋدى جوسپارلاپ وتىرمىز، – دەدى ازامات جولدانبايەۆ.
سونداي-اق ول كەزدەسۋ بارىسىندا تاۋەلسىز باقىلاۋشىلاردىڭ شتابى قۇرىلعانىن ايتا كەلىپ، الماتىلىقتاردى وسى باستامانى قولداۋعا شاقىردى.
«بۇگىنگى باسپا ءسوز كونفەرەنسيامىزدىڭ نەگىزگى سەبەبى – جاقىندا بولاتىن پرەزيدەنت سايلاۋى. سوندىقتان ءبىز مەملەكەتىمىزدىڭ بولاشاعىنا بەي-جاي قارامايتىن بەلسەندى جاستاردان تۇراتىن «ەل ەرتەڭى» تاۋەلسىز باقىلاۋشىلار شتابىن قۇرىپ جاتىرمىز»، – دەدى ارىپتەسىنىڭ ءسوزىن قولداعان تالعات جانىسباي.
سپيكەرلەر ءار باقىلاۋشىنىڭ رەسمي تىركەلەتىنىن، ولارعا ءتيىستى قۇجاتتاردىڭ ءبارى بەرىلەتىنىن، باقىلاۋشىلار ارنايى وقىتىلاتىنىن ايتتى.
كەزدەسۋ بارىسىندا اناستاسيا ۋلچەنكو ەل اراسىندا ب ا ق وكىلدەرىن «ءتورتىنشى بيلىك» دەپ اتايتىنىن، جۋرناليست – حالىقتىڭ كوزى ءارى ءۇنى ەكەنىن ەسكە سالدى. ءوزى سوندىقتان دا ەلىمىزدىڭ ازاماتى ءارى جاس مامان رەتىندە باقىلاۋشى بولۋعا شەشىم قابىلداعانىن ايتتى.
«ەل ەرتەڭى» بىرلەستىگى قىزمەتىنىڭ باستى ماقساتتارىنىڭ ءبىرى – جاستاردىڭ بويىندا ساياسي مادەنيەتتى قالىپتاستىرۋ جانە جالپىحالىقتىق سايلاۋلارعا قاتىسۋ تاجىريبەسىن جەتىلدىرۋ.
«ءبىز جاستاردى ەلىمىز ءۇشىن اسا ماڭىزدى وسى وقيعادان تىس قالماۋعا شاقىرامىز. باقىلاۋشى بولعىسى كەلەتىن، بىرلەستىكتىڭ جۇمىسىنا اتسالىسام دەگەن ازاماتتاردى ءبىز وقىتامىز، اقپاراتتاندىرامىز، پراكتيكالىق كومەك كورسەتەمىز. ءبىزدىڭ قوزعالىسقا بۇرىن باقىلاۋشى رەتىندە تاجىريبەسى بار ادامدار مەن قوعامدىق ۇيىمدار دا قوسىلادى دەپ ۇمىتتەنەمىز»، – دەدى جۋرناليست.