الماتىدا ەكولوگيا دەپارتامەنتىنىڭ 2025 جىلعى جۇمىسىنىڭ قورىتىندىسى شىقتى. وسى كەزەڭدە 125 تەكسەرىس جاسالىپ، 109 رەت ەكولوگيالىق زاڭناما تالابى بۇزىلعانى انىقتالىپ، ونداعان نۇسقاما بەرىلدى. زياندىلىقتى ازايتىپ، قالدىقتاردى باقىلاۋ مەن اۋا ساپاسىن باقىلاۋ باعىتى ءالى دە نەگىزگى باسىمدىق بولىپ قالىپ وتىر. الماتى قالاسى ەكولوگيا دەپارتامەنتىنىڭ باسشىسى دىنمۇحامەد لەسبەكوۆ وڭىرلىك كوممۋنيكاسيالار قىزمەتى الاڭىندا وتكەن باسپا ءسوز كونفەرەنسياسىندا وسىلاي دەپ مالىمدەدى.
ونىڭ ايتۋىنشا، 2025 جىلى ەكولوگيالىق رەتتەۋ ءبولىمى «ە-ليسەنزيالاۋ» پورتالى ارقىلى مەملەكەتتىك قىزمەتتىڭ بەس ءتۇرىن كورسەتكەن. بارلىعى 210 ءوتىنىش تۇسكەن، ولاردىڭ باسىم بولىگى (174) قورشاعان ورتاعا اسەردى باعالاۋ (ءقواب) قاجەتتىلىگىن ايقىنداۋعا قاتىستى بولدى. وسى وتىنىشتەر بويىنشا 24 قورىتىندى بەرىلدى، ءوتىنىشتىڭ ءبىرازىن يەلەرى كەرى قايتارىپ الىپ، كەيبىرىنەن باس تارتتى، بىرنەشەۋى ءالى قارالىپ جاتىر. قورشاعان ورتاعا اسەردى باعالاۋ ناتيجەسى بويىنشا 21 ءوتىنىش ءتۇسىپ، ونىڭ 15ء-ى بويىنشا قورىتىندى بەرىلدى. مەملەكەتتىك ەكولوگيالىق ساراپتاماعا 10 ءوتىنىش تاپسىرىلىپ، سونىڭ ءبىرى قورىتىندى شىعارۋمەن اياقتالدى. I ساناتتاعى نىساندارعا ەكولوگيالىق رۇقسات الۋ ءۇشىن 5 ءوتىنىش ءتۇستى، ولاردىڭ ۇشەۋى بويىنشا رۇقسات بەرىلدى. جىل ىشىندە كەشەندى ەكولوگيالىق رۇقساتتار الۋ بويىنشا وتىنىشتەر تىركەلمەدى.
«الماتىدا قورشاعان ورتاعا ەڭ كوپ اسەر ەتەتىن I ساناتتاعى 18 نىسان جۇمىس ىستەيدى. اۋانى قورعاۋ، سۋ رەسۋرستارىن، جەر مەن جەر قويناۋىن ساقتاۋ، فلورا مەن فاۋنانى قورعاۋ، قالدىقتاردى باسقارۋ، وسى زامانعى ەكولوگيالىق تەحنولوگيالاردى ەنگىزۋ مەن ەكولوگيالىق اعارتۋ سەكىلدى نەگىزگى باعىتتار بويىنشا ولارمەن ۇنەمى جۇمىس جۇرگىزەمىز»، – دەيدى دىنمۇحامەد لەسبەكوۆ.
الماتى قالاسىنىڭ ەكولوگيالىق ماسەلەلەرىن شەشۋ جونىندەگى جول كارتاسى اياسىندا توعىز ءىس-شارا قاراستىرىلعان. ولاردىڭ ءبىر بولىگى ورىندالىپ، قالعانى كەزەڭ-كەزەڭىمەن جۇزەگە اسىرىلىپ جاتىر. جول كارتاسىنىڭ نەگىزگى باعىتى جىلۋ ەنەرگەتيكاسى كاسىپورىندارى مەن كولىكتەن شىعاتىن شىعارىندىلاردى ازايتىپ، اۋانىڭ تابيعي اينالىمىن ساقتاۋعا، ساپالى كوگالداندىرۋعا، لاستانۋدى باقىلاۋ مەن قالدىقتاردى باسقارۋ جۇيەسىن جەتىلدىرۋگە باعىتتالعان. جول كارتاسىن ىسكە اسىرۋدىڭ ناتيجەسى 2026 جىلعى 9 قاڭتاردا وتكەن ەسەپتىك كەزدەسۋدە حالىققا ۇسىنىلعان بولاتىن.
2025 جىلى ەكولوگيالىق باقىلاۋعا ەرەكشە نازار اۋدارىلدى. دەپارتامەنت ماماندارى جوسپارلى پروفيلاكتيكالىق جۇمىس پەن ازاماتتاردىڭ ءوتىنىشى بويىنشا، سونداي-اق بۇرىن بەرىلگەن نۇسقامالاردىڭ ورىندالۋىن باقىلاۋ ماقساتىندا 125 تەكسەرۋ جۇرگىزدى. ناتيجەسىندە 109 زاڭبۇزۋشىلىق انىقتالىپ، ولاردى جويۋ تۋرالى 36 نۇسقاما بەرىلدى.
جۇمىستىڭ ەداۋىر بولىگىن قۇرامىندا اككرەديتتەلگەن سىناق زەرتحاناسى بار زەرتحانالىق-تالدامالىق باقىلاۋ ءبولىمى اتقاردى. 2025 جىلدىڭ 1–3 توقساندارى ارالىعىندا I جانە II ساناتتاعى نىسانداردان وندىرىستىك ەكولوگيالىق باقىلاۋ بويىنشا 549 ەسەپ قابىلداندى. مەملەكەتتىك ەكولوگيالىق باقىلاۋ ينسپەكتورلارىمەن بىرلەسىپ، اتموسفەرالىق اۋانىڭ، ستاسيونارلىق جانە جىلجىمالى كوزدەردىڭ، سۋ نىساندارىنىڭ، توپىراقتىڭ جانە رادياسيالىق جاعدايدىڭ لاستانۋىن باقىلاۋ ماقساتىندا 79 تەكسەرۋ جۇمىستارى جۇرگىزىلدى. جىل ىشىندە 101 زەرتحانالىق تەكسەرۋ جۇرگىزىلىپ، 332 سىناما الىنىپ، 1 413 زەرتحانالىق انىقتاما جاسالدى.
دەپارتامەنتتە الماتى قالاسىندا ەكولوگيالىق زاڭنامانىڭ ساقتالۋىن باقىلاۋ جۇمىستارى تۇراقتى نەگىزدە جالعاساتىنىن، قالانىڭ ەكولوگيالىق جاعدايىن جاقسارتۋ مەن قورشاعان ورتاعا تۇسەتىن جۇكتەمەنى ازايتۋ نەگىزگى مىندەت رەتىندە بولىپ قالا بەرەتىنىن اتاپ ءوتتى.