وڭىرلىك كوممۋنيكاسيالار قىزمەتىندە ەكولوگيا دەپارتامەنتىنىڭ بىلتىرعى جۇمىسىن قورىتىندىلاعان باسپا ءسوز كونفەرەنسياسى ءوتتى. وندا دەپارتامەنت باسشىسى دىنمۇحامەد لەسبەكوۆ رۇقساتسىز قوقىس ۇيىندىلەرىن انىقتاۋ مەن جويۋ بويىنشا قولعا الىنعان جۇمىستارىن بايانداپ بەردى.
ونىڭ ايتۋىنشا، «قازاقستان عارىش ساپارى» ۇلتتىق كومپانياسىنىڭ گەوسەرۆيسىن پايدالانىپ، عارىشتان باقىلاۋ جۇرگىزگەندە بىلتىر قالا اۋماعىندا تۇرمىستىق جانە قۇرىلىس قالدىعىن زاڭسىز توككەن 10 جەر انىقتالعان. مەدەۋ، تۇركسىب پەن الاتاۋ اۋدانىندا ورنالاسقان ولاردىڭ بارلىعى جەرگىلىكتى اتقارۋشى ورگانداردىڭ كۇشىمەن تۇگەل جويىلىپتى.
«وسىنداي ورىنداردى انىقتاپ قانا قويماي، ولاردى جويىپ، قالدىقتىڭ قايتا جينالۋىنا جول بەرمەۋ مىندەتىمىز»، - دەيدى دىنمۇحامەد لەسبەكوۆ.
الماتىنىڭ اۋماعىندا كوممۋنالدىق قاتتى قالدىقتاردى قابىلدايتىن پوليگوندار جوق بولعانىمەن، قالادا قوقىس شىعارۋ جاعى ەشقاشان كىدىرگەن ەمەس. ءقازىر 20 ۇيىم وسىمەن اينالىسادى، ولار قالانى 100 پايىز قامتىپ، قالدىق اتاۋلىنى الماتى وبلىسىنداعى پوليگوندار مەن سۇرىپتاۋ كەشەندەرىنە ۋاقىتىلى جەتكىزىپ وتىرادى. 2025 جىلى 536 مىڭ توننادان استام وسىنداي كوممۋنالدىق قاتتى قالدىق جينالىپ، شىعارىلعان.
ەكولوگيا دەپارتامەنتى ەسەپتىك كەزەڭدە 125 باقىلاۋ جۇمىسىن وتكىزدى، ونىڭ ىشىندە نىساندارعا بارىپ تا، بارماي-اق تا جۇرگىزىلگەن پروفيلاكتيكالىق تەكسەرۋلەر بار. سونىڭ ارقاسىندا ەكولوگيالىق زاڭنامانى بۇزعان 109 جاعداي انىقتالىپ، ولاردى جويۋ جونىندە 36 نۇسقاما بەرىلگەن. ماتەريالداردى قاراۋ قورىتىندىسى بويىنشا 53 اكىمشىلىك قۇقىق بۇزۋشىلىق تۋرالى حاتتاما راسىمدەلىپ، 41 اكىمشىلىك جازا قولدانىلىپ، جالپى سوماسى 8،5 ملن تەڭگە ايىپپۇل سالىنىپتى. ايىپپۇلدى ءوندىرۋدىڭ دەڭگەيى 99،3 پايىزعا جەتكەن.