وسى ماقساتتا وتكەن جىلى 3،5 ملرد تەڭگە جۇمسالعان.
2021 جىلى مەديسينالىق ساقتاندىرۋ قورى تەگىن كومەك پاكەتى شەڭبەرىندە كورسەتىلگەن مەديسينالىق كومەككە 82،2 ملرد تەڭگە جۇمسادى. بۇل تۋرالى «الەۋمەتتىك مەديسينالىق ساقتاندىرۋ قورى» كەاق الماتى قالاسى فيليالىنىڭ ديرەكتورى تىلەۋحان ابىلدايەۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بىلتىر الماتىدا مەديسينالىق ساقتاندىرۋ قورى تەگىن كومەك پاكەتى شەڭبەرىندە كورسەتىلگەن مەدكومەككە 82،2 ملرد تەڭگە جۇمسالدى. ونىڭ ىشىندە، 9،8 ملرد تەڭگە جەدەل جاردەم جانە سانيتارلىق اۆياسيا قىزمەتىنە، 36،8 ملرد تەڭگە – باستاپقى مەديسينالىق-سانيتارلىق كومەككە، ياعني، ەمحانا دەڭگەيىندە كورسەتىلگەن قىزمەتتەرگە، 16،5 ملرد تەڭگە – ونكولوگيالىق كومەككە، 2،4 ملرد تەڭگە – كونسۋلتاتيۆتىك-دياگنوستيكالىق كومەككە، 5،8 ملرد تەڭگە – امبۋلاتورلىق گەمودياليزگە ءبولىندى»، - دەدى تىلەۋحان ابىلدايەۆ.
سونىمەن قاتار، ول جوعارى تەحنولوگيالى مەديسينالىق قىزمەتتەردى پايدالانۋ كورسەتكىشى ارتقانىن تىلگە تيەك ەتتى.
«قور 2021 جىلى جوعارى تەحنولوگيالاردىڭ كومەگىمەن جاسالاتىن وپەراسيالار مەن مانيپۋلياسيالارعا 14،9 ملرد تەڭگە تولەدى. مىسالى، 2020 جىلى الماتى قالاسى بويىنشا جالپى قۇنى 563 ملن تەڭگە بولاتىن 643 ەكو پروسەدۋراسى جاسالعان بولسا، 2021 جىلى اتالعان قىزمەت سانى 5،7 ەسە ارتقان. وتكەن جىلى 3687 ەكستراكورپورالدى ۇرىقتاندىرۋ جاسالىپ، وعان 3،5 ملرد تەڭگە جۇمسالدى. تاعى ءبىر مىسال، 2020 جىلى جوعارى تەحنولوگيالاردىڭ كومەگىمەن 184 كارديوحيرۋرگيالىق وپەراسيا جاسالعان بولسا، 2021 جىلى اتالعان قىزمەت كولەمى 7 ەسە ارتىپ، 1329 وتا جاسالعان. وعان قور 5،7 ملرد تەڭگە تولەدى»، - دەدى ول.
2021 جىلى تەگىن مەديسينالىق كومەك جانە مىندەتتى الەۋمەتتىك مەديسينالىق ساقتاندىرۋ پاكەتتەرى شەڭبەرىندە دارى-دارمەكپەن قامتۋعا 24،8 ملرد تەڭگە ءبولىندى.
«تەگىن مەديسينالىق كومەك پاكەتى بويىنشا 35 ءتۇرلى سىرقات بويىنشا دارى-دارمەك بەرىلەدى. ال، ءمامس پاكەتىندە ەرەسەكتەرگە 41 نوزولوگيا، بالالارعا 63 نوزولوگيا بويىنشا ءدارى بەرىلەدى. 2021 جىلى تەگىن مەديسينالىق كومەك جانە مىندەتتى الەۋمەتتىك مەديسينالىق ساقتاندىرۋ پاكەتتەرى شەڭبەرىندە دارى-دارمەكپەن قامتۋعا 24،8 ملرد تەڭگە بولىنگەن بولاتىن. جىل سوڭىنا دەيىن تەگىن مەديسينالىق كومەك پاكەتىندە – 219 مىڭنان استام پاسيەنت، ءمامس پاكەتىندە – 26 مىڭنان استام ەرەسەك پەن 40 مىڭنان استام بالا دارىمەن قامتاماسىز ەتىلدى. ال، 2022 جىلعا 20 ملرد تەڭگەنىڭ دارى-دارمەگىن ساتىپ الۋ تۋرالى جوسپار بەكىتىلدى. دارىلىك زاتتار جىل باسىنان بەرى بەكىتىلگەن كەستە بويىنشا جەتكىزىلىپ جاتىر»، - دەدى "الەۋمەتتىك مەديسينالىق ساقتاندىرۋ قورى" كەاق الماتى قالاسى فيليالىنىڭ ديرەكتورى تىلەۋحان ابىلدايەۆ.