الماتىنىڭ "زەردەلى" ىقشاماۋدانىنداعى قۇرىلىسى بىتپەگەن ەكى تۇرعىن ءۇيدى سۇرۋگە جەرگىلىكتى بيۋدجەتتەن 1 ميلليارد 400 ميلليون تەڭگە بولىنگەن.
بۇل تۋرالى قالالىق قۇرىلىس باسقارماسىنىڭ ماماندارىنان ءمالىم بولدى، دەپ حابارلايدى Almaty-akshamy.kz 24.kz سايتىنا سىلتەمە جاساپ.
ىقشاماۋدان العاشىندا «العاباس-6» دەپ اتالعان. بۇعان دەيىن قالا اكىمى ەربولات دوسايەۆ، قازاق قۇرىلىس جانە ساۋلەت عىلىمي-زەرتتەۋ جانە جوبالاۋ ينستيتۋتىنىڭ ساراپتاماسى نەگىزىندە سالىنىپ بىتپەگەن توعىز قاباتتى ەكى عيماراتتىڭ بۇزىلاتىنىن ايتقان ەدى. سەبەبى قۇرىلىس تالاپقا ساي جۇرگىزىلمەگەن. مەردىگەر كومپانيا جاۋاپسىز مەكەمە تىزىمىنە ەنگىزىلىپ، سوت شەشىمىمەن بيۋدجەتكە 140 ميلليون تەڭگە وندىرىلگەن. اكىمدىك وكىلىنىڭ ايتۋىنشا، قۇرىلىسى اياقتالماعان بۇل ۇيلەردە ۇلەسكەرلەردىڭ قاراجاتى جوق. ساپاسىز تۇرعىن ۇيلەر جىل سوڭىنا دەيىن ءسۇرىلىپ، كەلەسى جىلى ورنىن اباتتاندىرۋ جۇمىستارى باستالادى. ايتا كەتەيىك، "زەردەلى" ىقشاماۋدانىندا قيسايعان 30 ءۇيدىڭ 23ء-نىڭ ىرگەتاسى كۇشەيتىلگەن. جىل سوڭىنا دەيىن تاعى 7 ءۇي نىعايتىلادى.
«ينستيتۋتتىڭ قورىتىندىسى بويىنشا ءۇيدىڭ ساپاسى وتە ناشار. اتاپ ايتقاندا، ارماتۋراسى سايكەس كەلمەيدى. ءۇي قيسايىپ دۇرىس سالىنباعان. جەرگىلىكتى بيۋدجەتتەن بەرىلدى. ەكى ءۇيدى بۇزۋعا. ويتكەنى تەرريتورياسى وتە كىشكەنتاي، كوردىڭىزدەر. ۇلكەن تەحنيكالار كىرە المايدى. جۇمىسى وتە كوپ ادام كۇشىمەن جاسالىناتىن جۇمىس. توعىز قاباتتى ءۇيدى بۇزۋ ءۇشىن ۇلكەن جۇمىس كەرەك وعان»، - دەدى الماتى قالالىق قۇرىلىس باسقارماسى باسشىسىنىڭ ورىنباسارى ايدار نۇرعوجايەۆ.