ەلىمىزدە قىزىلشاعا شالدىققانداردىڭ سانى 180-نەن اسىپ كەتتى.
سوعان قاراماستان، 2 مىڭنان استام اتا-انا بالالارىنا جۇقپالى اۋرۋعا قارسى ەكپە سالدىرتۋدان باس تارتىپ وتىر. دارىگەرلەر مۇنىڭ سوڭى قايعىلى وقيعاعا اكەپ سوقتىرۋى مۇمكىن دەپ دابىل قاعۋدا. ويتكەنى بالالار اراسىندا ا گاپاتيتىن جۇقتىرۋ جيىلەگەن، دەپ حابارلايدى Almaty-akshamy.kz Qazaqstan.tv سايتىنا سىلتەمە جاساپ.
جاقسىلىق بايشىعاشيەۆ بالاسىنا ەكپە سالدىرۋعا اۋەلدە قارسى بولعان. ول پرەپاراتتىڭ پايداسىنا كۇمانمەن قاراعانىن ايتادى. ءبىر جارىم جاسىندا سالىنۋى كەرەك ۆاكسينانى ۇلى ەكىگە تولعاندا ءبىر-اق الىپ وتىر.
«كوبى اۋىرىپ جاتىر دەيدى. سوندىقتان ءبىز دە ۆاكسينا الۋعا كەلدىك. بۇنى الماسا تاعى بولمايدى»، - دەيدى قالا تۇرعىنى جاقسىلىق بايشىعاشيەۆ.
ناۋرىز ايىنىڭ ورتا تۇسىندا تارالا باستاعان جۇقپالى اۋرۋعا شالدىققانداردىڭ دەنى - الماتى تۇرعىندارى. قالالىق دەنساۋلىق ساقتاۋ باسقارماسى بەرگەن مالىمەتكە سۇيەنسەك، 26 ادام ءقازىر اۋرۋحانالاردا ەم قابىلداپ جاتىر.
«اۋرۋحانالاردا ستاسيونارلىق ەم قابىلداپ جاتقان 7 ەرەسەك جانە 19 بالا بار. بارلىعىنىڭ جاعدايى تۇراقتى. اۋىر ناۋقاستار جانە جۇكتى ايەلدەر تىركەلگەن جوق»، - دەيدى قالالىق دەنساۋلىق ساقتاۋ باسقارماسى ەپيدەميولوگيا ءبولىمى باسشىسىنىڭ مىندەتىن اتقارۋشى ميراس شادمان.
ناقتىلاساق، قىزىلشا جۇقتىرعان الماتىلىقتاردىڭ 80 پايىزى - 14 جاسقا دەيىنگى بالالار. وسىنى نەگىزگە العان دارىگەرلەر مەگاپوليستە ۆاكسينا الۋى كەرەك 8 مىڭ بالا مەرزىمىنەن كەشىگىپ جاتقانىنا الاڭداۋلى. ءقازىر مەملەكەتتىك جانە جەكەمەنشىك ەمحانالاردا تەگىن ەكپە سالۋ جۇمىستارى ءجۇرىپ جاتىر. ءبىراق اتا-انالاردىڭ باسىم بولىگى ۆاكسينادان ۇزىلدى-كەسىلدى باس تارتىپ وتىر. مامانداردىڭ ايتۋىنشا، ءالى كۇنگە دەيىن قىزىلشا اۋرۋىنىڭ ناقتى ءبىر ەمى تابىلماعان. ال، ەكپە سىرقاتتىڭ الدىن الۋعا جاردەمدەسەدى دەيدى اق حالاتتىلار.
قىزىلشاعا قارسى سالىناتىن ۆاكسينانىڭ مولشەرى - 0،5 مل. ول تەمپەراتۋراسى +2 مەن +8 گرادۋستى قۇرايتىن ارنايى توڭازىتقىشتاردا ساقتالادى. بۇنىڭ ەرەكشەلىگى ەكپەنى العان بالانىڭ بويىندا قىزىلشادان بولەك، قىزامىققا جانە پاراتيت ۆيرۋسىنا قارسى ومىرلىك يممۋنيتەت قالىپتاسادى.
سوندىقتان ۆاكسينا الماعاندار قىزىلشا جۇقتىرسا، ارتى كوپ جاعدايدا اسقىنۋلارعا الىپ كەلەدى.
«ەگىلمەگەن بالالاردا ينفەكسيا اۋىر تۇردە، كوپ جاعدايدا اسقىنۋلارعا الىپ كەلەدى. پنيەۆمونيا – وكپەنىڭ قابىنۋى، ۆيرۋستىق قابىنۋ ەمى جوق. كوپ جاعدايدا ولىم-جىتىمگە اكەپ جاتادى. بالالاردا عانا ەمەس ەرەسەك ادامدار اراسىندا. ودان باسقا كوزدىڭ قابىنۋى كەزىندە ادام ءومىر بويىنا سوقىر بولىپ قالۋى مۇمكىن. سول سياقتى ميدىڭ قابىنۋى»، - دەيدى ق ر دسم سانيتاريالىق-ەپيدەميولوگيالىق باقىلاۋ كوميتەتىنىڭ باسقارما باسشىسى نۇرشاي ازىمبايەۆا.
قىزىلشا - جىل سايىن تارالاتىن اۋرۋ. دەگەنمەن بىلتىر ەلدە اتالعان ۆيرۋستى جۇقتىرعان 4-اق ادام تىركەلگەن بولسا، بيىل سىرقاتتانعاندار سانى 187-گە جەتتى.