ەسىرتكىنىڭ زاڭسىز اينالامىنا قاتىستى 601 قۇقىق بۇزۋشىلىق انىقتالدى
الماتىدا ەسىرتكى ساتۋشىلار 10 جانە 11 جىلعا باس بوستاندىعىنان ايىرىلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
ەسىرتكى قىلمىسى الماتىنىڭ ىرگەسىندەگى ساياجايدا، جالدامالى ۇيدە ەسىرتكى زەرتحاناسىن ۇيىمداستىرعان ەكى جىگىتكە قاتىستى بولىپ وتىر. ولاردى اشكەرەلەۋ بويىنشا ارنايى ءىس-شارا كەزىندە عيماراتتى ءتىنتۋ بارىسىندا حيميالىق رەاگەنتتەر، سينتەتيكالىق پرەپاراتتاردى جاساۋعا ارنالعان ءارتۇرلى كومپونەنتتەر، سونداي-اق ساتۋعا دايىن جالپى سالماعى 3،5 كەلى بولاتىن مەتكاتينون (مەفەدرون) زاتى تاركىلەندى. بۇل ءونىمنىڭ ساتىلىمداعى باعاسى 40 ملن تەڭگەنى قۇرايتىن ەدى. الماتى قالالىق سوتىنىڭ ۇكىمىمەن ولار 10 جانە 11 جىلعا باس بوستاندىعىنان ايىرىلدى.
«ەسىرتكى قىلمىسى – ۇلت دەنساۋلىعىنا ۇلكەن ءقاۋىپ. بۇرىننان بەلگىلى ەسىرتكىلەرمەن قاتار، جاڭا سينتەتيكالىق تۇرلەرى كۇن سايىن دەرلىك پايدا بولادى، ولار ارزانىراق جانە ساتىپ الۋعا ىڭعايلى. ءبىزدىڭ بولىمشە قىزمەتىندەگى باسىم باعىت – سينتەتيكالىق پرەپاراتتاردى انىقتاۋ جانە ولاردى ءوندىرۋ بويىنشا زەرتحانانىڭ قىزمەتىن توقتاتۋ. الماتىدا جۇرگىزىلگەن ءىس-شارالاردىڭ ناتيجەسىندە ءۇش زەرتحانا جويىلدى، ەسىرتكى زاتتارىن جارنامالاۋدىڭ التى فاكتىسى انىقتالدى. قىلمىستىڭ بۇل ءتۇرى، ادەتتە، ءبىر اداممەن ەمەس، توپپەن جاسالادى، ولاردىڭ ءارقايسىسىنىڭ جاۋاپكەرشىلىگى ناقتى بەلگىلەنگەن. وسىلايشا، ءبىز قىلمىستىڭ ۇيىمداسقان تۇرىمەن كۇرەسىپ جاتىرمىز. جاسىرىن ورىنداردا (بەتبەلگىلەردە)، ينتەرنەت ارقىلى ەلەكتروندى تولەمدەردى پايدالانا وتىرىپ، سينتەتيكالىق ەسىرتكىنى كونتاكتىسىز ادىسپەن تاراتۋ ءۇردىسى – وزەكتى ماسەلەلەردىڭ ءبىرى. ءبىز 443 ينتەرنەت-سايتتى بۇعاتتاۋ ءۇشىن ىىم-نە اقپارات جىبەردىك»، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.
انىقتاما ءۇشىن: جىل باسىنان بەرى قالادا ەسىرتكىنىڭ زاڭسىز اينالىمىنا قاتىستى 601 قۇقىق بۇزۋشىلىق انىقتالدى. 372 كەلىدەن استام ەسىرتكى زاتتارى تاركىلەنىپ، زاڭسىز اينالىمعا جىبەرىلگەن جوق.