الماتىدا ەگجەي-تەگجەيلى جوسپارلاۋ جوبالارىنا (ەتج) وزگەرىستەر ەنگىزۋگە جىل سوڭىنا دەيىن موراتوريي ەنگىزىلەدى، دەپ حابارلايدى almaty-akshamy.kz
بۇل تۋرالى الماتى اكىمى ەربولات دوسايەۆ ناۋرىزباي اۋدانىنىڭ تۇرعىندارىمەن كەزدەسۋ بارىسىندا مالىمدەدى.
تۇرعىننىڭ سۇراعى:
ءبىزدىڭ اۋداننىڭ قۇرىلعانىنا 10 جىل بولدى، وسى ۋاقىت ىشىندە اۋدان دامىپ، قۇرىلىستار كوبەيدى. جاقىندا اكىمدىك نۇكتەلى قۇرىلىستى شەكتەيتىن ەگجەي-تەگجەيلى جوسپارلاۋدىڭ جاڭا جوبالارىن قابىلدادى. ءبىراق زاڭ بويىنشا ولارعا جىلىنا ەكى رەت وزگەرىستەر ەنگىزۋگە بولادى. ەتج-عا ەنگىزىلگەن بارلىق وڭ باستاما وسىعان بايلانىستى وزگەرىپ كەتپەي مە؟
الماتى اكىمى ەربولات دوسايەۆتىڭ جاۋابى:
بىلتىر مامىر ايىندا ۇكىمەت 2040 جىلعا دەيىن قالانىڭ باس جوسپارىن بەكىتتى، سودان كەيىن ونى جۇزەگە اسىرۋ ءۇشىن ساراپشىلار جانە قالا تۇرعىندارىمەن تالقىلاۋدان كەيىن ءبىز ءار اۋداننىڭ جاڭا جول ەرەجەلەرىن قابىلدادىق.
الماتىنىڭ بولاشاق دامۋى ورتا قاباتتى قۇرىلىسقا نەگىزدەلگەن. ەتج-داعى بارلىق ايلانىڭ جولىن كەستىك، قوسىمشا جىل سوڭىنا دەيىن تۇزەتۋ ەنگىزۋگە موراتوريي جاريالادىم. ەگەر وزگەرىس قاجەت بولسا، كەلەسى جىلى قاراستىرامىز. مەنىڭ ويىمشا، ازىرلەۋشىلەر دە، تۇرعىندار دا مەنى تۇسىنەدى، ويتكەنى ءبىز جوسپاردىڭ تۇراقتىلىعىن قامتاماسىز ەتۋىمىز كەرەك.
ەتج-نى ازىرلەۋ كەزىندە قالا تۇرعىندارىنىڭ پىكىرى بارىنشا ەسكەرىلدى، قىزىل سىزىقتار بويىنشا بۇرىنعى قاتەلىكتەر مەن باسقالارىن رەتكە كەلتىردىك. ءبىراق قالادا دامۋدىڭ بەلگىلى ءبىر باسىمدىعى بار ەكەنىن جانە ولار ءارقاشان جەكە ازاماتتاردىڭ پىكىرىمەن سايكەس كەلمەيتىنىن ءتۇسىنۋ كەرەك. مىسالى، ناۋرىزباي اۋدانىندا ءبىز قوعامدىق كەڭىستىكتى بارىنشا جاقسارتۋعا تىرىسامىز، بولاشاقتا بارلىق ۇيلەر جەر استى تۇراعىمەن جانە قاجەتتى الەۋمەتتىك ينفراقۇرىلىمدارمەن سالىنادى.