پرەزيدەنتتىڭ تاپسىرماسى بويىنشا ۇكىمەت "قازاقستان بالالارى" ءبىرىڭعاي تۇجىرىمداماسىن قابىلدادى، - دەپ حابارلايدى aqshamnews.kz ءتىلشىسى.
"بۇگىندە ەلىمىزدە شامامەن 7 ملن بالا ءوسىپ كەلەدى. ياعني، حالىقتىڭ ۇشتەن ءبىر بولىگىنەن استامىن بالالار قۇراپ وتىر، ناقتى ايتساق – 34%. ەلىمىزدىڭ بولاشاعى وتانشىل، جاسامپاز ۇرپاق تاربيەسىنە تىكەلەي بايلانىستى. سوندىقتان دا مەملەكەت باسشىسى ۇلتتىق قۇرىلتايدا “قازاقستان بالالارى” ءبىرىڭعاي تۇجىرىمداماسىن ازىرلەۋدى تاپسىردى، - دەپ اتاپ ءوتتى ولجاس بەكتەنوۆ ۇكىمەت وتىرىسىندا.
ۇكىمەت وتىرىسىندا جاۋاپتى مينيسترلەر ءبىرىڭعاي تۇجىرىمداما جوباسىنىڭ نەگىزگى تاسىلدەرى تۋرالى باياندادى.
"قازاقستان بالالارى" تۇجىرىمداماسىندا ءبىلىم بەرۋ، دەنساۋلىق ساقتاۋ، قاۋىپسىزدىك، الەۋمەتتىك قامسىزداندىرۋ جانە وتباسىنىڭ ءال-اۋقاتى سالاسىندا بالالاردىڭ قۇقىقتارىن قورعاۋ جونىندەگى ناقتى ءىس-شارالار جوسپارى قامتىلعان.
پرەمەر-مينيستر كەيىنگى جىلدارى بالالاردىڭ قۇقىقتارىن قورعاۋ بويىنشا ءبىرقاتار شارا قابىلدانعانىن اتاپ ءوتتى.
نە ىستەلدى؟
- "زاڭنامالىق بازا ايتارلىقتاي كەڭەيتىلدى. اسىرەسە، بالالارعا قاتىستى قىلمىستىق ارەكەتتەر ءۇشىن جازانىڭ بۇلتارتپاس قاعيداتى قاتاڭ ساقتالادى.
- وتباسى ماسەلەلەرى، ايەلدەر مەن بالالاردىڭ قۇقىقتارىن قورعاۋ بويىنشا 111 ءبىرىڭعاي بايلانىس ورتالىعى ىسكە قوسىلدى. وعان جۇگىنگەن جاعدايدا مىندەتتى تۇردە كومەك كورسەتىلىپ، تەكسەرۋ شارالارى جۇرگىزىلەدى.
- بارلىق وڭىردە بالا قۇقىقتارى جونىندەگى وڭىرلىك ۋاكىلدەر جۇمىس ىستەيدى، ولار بالا قۇقىقتارىنىڭ ساقتالۋىن باقىلايدى ءارى بالالار مەن وتباسىلارعا كومەك كورسەتەدى.
- 1 اقپاننان باستاپ بارلىق ءبىلىم بەرۋ ۇيىمىنا "توسىننان تەكسەرۋ" قاعيداتى بويىنشا ەرەكشە باقىلاۋ مەن قاداعالاۋ جۇيەسى ەنگىزىلەدى. بۇل بالالاردى ساۋىقتىرۋ، ولاردىڭ قاۋىپسىزدىگى مەن تاماقتانۋ ماسەلەلەرىنە قاتىستى". ولجاس بەكتەنوۆ دەنساۋلىق ساقتاۋ، وقۋ-اعارتۋ، مادەنيەت، ەڭبەك جانە الەۋمەتتىك قورعاۋ، تۋريزم جانە ىشكى ىستەر مينيسترلىكتەرىنە اكىمدىكتەرمەن بىرلەسىپ، وسى جىلدىڭ 30 قاڭتارىنا دەيىن ەرەكشە باقىلاۋ مەن قاداعالاۋعا جاتاتىن نىساندار ءتىزىلىمىن دايىنداۋدى تاپسىردى.
- بالالاردىڭ قۇقىقتارىن قورعاۋ دەڭگەيىن ارتتىرۋ ماقساتىندا قامقورشىلىق ورگاندارى ماماندارىنىڭ جاڭا شتاتتىق ءنورماتيۆى ەنگىزىلدى. ول 1 جىل ىشىندە ماماندار سانىن 3 ەسەدەن استام ارتتىرۋعا مۇمكىندىك بەردى.
- وسى ماماندار قاتارىنان ءار وڭىردە بالا قۇقىقتارىن قورعاۋ باسقارمالارى قۇرىلىپ جاتىر.
تۇيتكىلدى ماسەلەلەر:
"كەيىنگى جىلدارى بالالاردىڭ ساپالى مەديسينالىق كومەك الۋ مۇمكىندىگى ايتارلىقتاي جاقساردى. الايدا، مامانداردىڭ، دارىلىك زاتتاردىڭ جەتىسپەۋشىلىگىنە، بالالاردى وڭالتۋ ماسەلەلەرى بويىنشا ءتۇسىپ جاتقان شاعىمدار از ەمەس. ەرەكشە ءبىلىم بەرۋ قاجەتتىلىكتەرى بار بالالاردى قولداۋدىڭ ءبىرقاتار جاڭا تەتىكتەرى ەنگىزىلدى. ءبىراق ونى ءتيىمدى ىسكە اسىرۋ ءۇشىن ءتيىستى جاعدايلار مەن ارنايى ماماندار – دەفەكتولوگ، لوگوپەد، سۋردولوگتەر قاجەت. بالالاردىڭ، سونىڭ ىشىندە ولاردىڭ سيفرلىق كەڭىستىكتەگى قاۋىپسىزدىگىن قامتاماسىز ەتۋ ماسەلەلەرى ءالى دە وزەكتى. كوپتەگەن اۋىل بالالارى ۇيىرمەلەر مەن زاماناۋي ءبىلىم بەرۋ تەحنولوگيالارىنان تىس قالادى. جاسوسپىرىمدەرگە ءتيىستى كوڭىل بولىنبەيدى ءارى ولار ءوزىن دامىتۋ ءۇشىن تىڭ مۇمكىندىكتەردەن ايرىلىپ وتىر. بۇل باعىتتا جۇيەلى تۇردە جۇمىس جۇرگىزىپ، وقۋ-اعارتۋ، دەنساۋلىق ساقتاۋ، ەڭبەك جانە الەۋمەتتىك قورعاۋ، ىشكى ىستەر مينيسترلىكتەرى مەن ءوڭىر اكىمدىكتەرى اراسىنداعى ۆەدومستۆوارالىق ۇيلەستىرۋدى كۇشەيتۋ قاجەت. تۇجىرىمدامادا كوزدەلگەن نىسانالى ينديكاتورلار بالالاردى دامىتۋدىڭ، قولداۋ مەن قورعاۋدىڭ ورنىقتى جۇيەسىن قالىپتاستىرۋى ءتيىس"، - دەپ اتاپ ءوتتى ولجاس بەكتەنوۆ.