الماتىدا دۇكەن ۇرىسى قولعا ءتۇستى

مەدەۋ اۋداندىق پوليسيا قىزمەتكەرلەرى دۇكەندەردەن ۇرلىق جاساۋ دەرەكتەرىن انىقتادى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«ق ر قك-نىڭ 188-بابى 3-بولىگىنىڭ 2-3-تارماعىندا كوزدەلگەن قىلمىستىق قۇقىقبۇزۋشىلىقتى جاسادى دەگەن كۇدىكپەن 37 جاستاعى ب. ەسىمدى ازامات ۇستالدى. تەرگەۋ بارىسىندا كۇدىكتى زاڭسىز بايۋ ماقساتىندا تۇنگى ۋاقىتتا تەرەزەلەردى سىندىرىپ، دۇكەندەرگە كىرىپ، كاسسادان اقشا مەن حالىق تۇتىناتىن تاۋارلاردى ۇرلاعانى انىقتالدى. قاسكوي ۇستالدى. ول ءبىزدىڭ اۋدان اۋماعىنداعى ەكى دۇكەننەن ۇرلىق جاساعانىن مويىندادى»، –  دەدى مەدەۋ اۋداندىق پوليسيا باسقارماسىنىڭ باستىعى داۋرەن وتەبايەۆ.

سپيكەردىڭ ايتۋىنشا، قازىرگى ۋاقىتتا كۇدىكتىنىڭ الماتى قالاسى بويىنشا وسىعان ۇقساس، بۇرىن جاسالعان قىلمىستارعا قاتىسى بار-جوعى تەكسەرىلۋدە. 

«وسى ادامنىڭ قىلمىستىق ارەكەتىنەن زارداپ شەككەن ازاماتتار بار بولسا، مەدەۋ اۋداندىق پب-نىڭ كەزەكشى بولىمىنە نەمەسە مىنا تەلەفون نومىرلەرىنە حابارلاسۋلارىڭىزدى سۇرايمىز: 8 (727) 254-48-02؛ 254-48-10 جانە 8-702-476-66-60»، – دەپ اتاپ ءوتتى د. وتەبايەۆ.