كۇدىكتى ۋاقىتشا ۇستاۋ يزولياتورىنا قامالدى.
الماتىدا ەر ادام قارۋمەن قورقىتىپ، دۇكەن توناعان، دەپ حابارلايدى Almaty-akshamy.kz.
ءىىم سايتىنىڭ مالىمەتىنشە، قالانىڭ بوستاندىق اۋدانىندا تۇنگى ساعات بىردە دۇكەن تونالدى.
«روزىباكييەۆ كوشەسىندە ورنالاسقان تاۋلىك بويى جۇمىس ىستەيتىن ازىق-تۇلىك دۇكەنىنە بەلگىسىز بىرەۋ كليەنت رەتىندە كىرىپ، قارۋ قولدانىپ، كاسساداعى اقشانى ۇرلاپ كەتكەن. كۇزەتشى مەن كاسسير ءوز ومىرلەرى ءۇشىن قاۋىپتەنىپ، توناۋشىنىڭ تالابىن ورىنداپ، تۇسكەن اقشانى بەردى. بۇل قىلمىستى اشۋ ماقساتىندا كريمينالدىق پوليسيانىڭ تاجىريبەلى جەدەل قىزمەتكەرلەرىنەن جانە اۋداندىق پب-نىڭ ءتارتىپ ساقشىلارىنان ارنايى جەدەل ىزدەستىرۋ توبى قۇرىلدى. ءبىر تاۋلىكتەن كەيىن پوليسيانىڭ ارنايى جاساعىنىڭ كومەگىمەن كۇدىكتى قولعا ءتۇستى. ونىڭ جۇمىس ورنىندا، داياشى بولىپ جۇمىس ىستەيتىن ءدامحانالاردىڭ بىرىندە، قىزمەتكەرلەرگە ارنالعان كيىم اۋىستىراتىن بولمەدە زاتتاي ايعاق ساقتالعان سومكە تابىلدى، اتاپ ايتقاندا، وتتىق تۇرىندە جاسىرىلعان مىلتىق، كۇدىكتىنىڭ توناۋ كەزىندە كيگەن كيىمدەرى مەن باسقا دا قۇرالدار»، – دەپ حابارلادى الماتى قالالىق پوليسيا دەپارتامەنتى باستىعىنىڭ ورىنباسارى ديدار احانوۆ.
تاجىريبەلى قاراقشى – شىمكەنت قالاسىنىڭ تۇرعىنى، 24 جاستاعى ت.ەسىمدى ازامات بولىپ شىقتى. الماتىدا ول تابىس تابۋ ءۇشىن جۇرگەن جانە تاجىريبە كورسەتكەندەي، بۇل تابىستار كوبىنەسە قىلمىستىق سيپاتتا بولعان.
«ونىڭ ازىق-تۇلىك دۇكەندەرىنە جاسالعان تاعى ەكى قاراقشىلىق شابۋىلعا قاتىسى بار ەكەندىگى انىقتالدى. قىلمىستاردىڭ قولجازباسى بىردەي. ساراپتاما جۇرگىزۋ ۇستىندەمىز. كۇدىكتى ۋاقىتشا ۇستاۋ يزولياتورىنا قامالدى»، – دەدى ديدار احانوۆ.