الماتىدا دىنمۇحامەد احمەت ۇلى قونايەۆقا تيەسىلى بولعان زيل-114 ءليمۋزينى قايتا قالپىنا كەلتىرىلدى.
كەڭەستىك قازاقستاننىڭ باسشىسى بۇل كولىكتى 1976-1978 جىلدارى مىنگەن. 90-جىلدارى گاراجدا تۇرعان ەسكىنىڭ كوزى ءبىراز ۋاقىتتان سوڭ جەكەنىڭ قولىنا وتەدى. ال، بىلتىر ماشينا قونايەۆ اتىنداعى حالىقارالىق قورعا قايتارىلدى. قالپىنا كەلتىرىلگەن سيرەك كەزدەسەتىن كولىك العاش رەت جۋرناليستەرگە كورسەتىلدى، دەپ حابارلايدى Almaty-akshamy.kz 24.kz-كە سىلتەمە جاساپ.
باستاپقى قالپىنا كەلتىرىلگەن ليمۋزينگە قاراپ، زاۋىتتان شىققانىنا 50 جىل بولعان دەگەنگە سەنۋ قيىن. جەكە كومپانيانىڭ قاراجاتىمەن قايتا جاڭارعان كولىكتىڭ قوزعالتقىشى، ءتىپتى راديوسى دا ءتۇپنۇسقا قالپىندا ساقتالعان. تاريحي جادىگەر سونىسىمەن باعالى. كسرو ساياسي بيۋروسىنىڭ مۇشەلىگىنە سايلانعان قونايەۆقا قىزمەتتىك مارتەبەسىنە سايكەس جوعارى دارەجەلى كولىك تيەسىلى ەدى. سوندىقتان 1976 جىلى زيل-114 ءليمۋزينى ديماش احمەتۇلىنا قىزمەتتىك كولىك رەتىندە بەرىلەدى.
بولات قاجىاكبار بايبول، د.قونايەۆ اتىنداعى حالىقارالىق قوردىڭ ۆيسە-پرەزيدەنتى:
- برەجنيەۆ لەونيد يليچ بىردە: «ديماش احمەت ۇلى سىزگە كولىك بەرىلدى مە؟»، دەپ سۇرايدى. ديماش احمەت ۇلى: «جوق، ازىرگە المادىم»، - دەيدى. «وندا مەنىڭ كولىگىمدى الىڭىز»، - دەيدى برەجنيەۆ. بىلايشا ايتقاندا، بۇل كولىكتى لەونيد يليچ ديماش احمەتۇلىنا سىيعا بەرەدى.
زيل-114 كولىگى كەزىندە كەڭەس وداعىنىڭ اۆتوموبيل ونەركاسىبىنىڭ ەڭ جوعارى جەتىستىگى بولدى. 1967-1978 جىل ارالىعىندا بار بولعانى 103 داناسى شىقتى. سالماعى 3 توننادان استام، ۇزىندىعى – 6 مەتر. ليمۋزين سەگىز ءسيليندرلى 7 ليترلىك قوزعالتقىشپەن جابدىقتالعان. ياعني، قۋاتى 300 اتتىڭ كۇشىنە تەڭ. قونايەۆتىڭ جەكە جۇرگىزۋشىسى، سول كەزدەگى مەملەكەتتىك قاۋىپسىزدىك كوميتەتىنىڭ قىزمەتكەرى 25 جاستاعى سەرگەي كورنەيەۆ ەدى. اراعا كوپ جىلدار سالىپ، سەرگەي ميحايلوۆيچ بۇگىن العاش رەت جاڭارتىلعان كولىكتىڭ تىزگىنىنە قايتا وتىردى. كورنەيەۆ ديماش احمەتۇلىن كولىكپەن جۇمىسقا اپارعان كەزىن ەسكە الدى.
سەرگەي كورنەيەۆ، د.قونايەۆتىڭ جەكە جۇرگىزۋشىسى:
- شىنىمدى ايتسام، سول كەزدە ارقامنان سۋىق تەر شىقتى. قالايدا قاتەلەسپەۋدى ويلادىم. بىرىنشىدەن، مەنىڭ ارتىمدا مەملەكەت باسشىسى وتىر، ەكىنشىدەن، قاتتى تولقىپ تۇرعانىم بار. دەگەنمەن، دىتتەگەن جەرىمىزگە جەتتىك. ديماش احمەت ۇلى مەنىڭ جايىمدى سەزىپ وتىرىپتى، كولىكتەن تۇسكەندە «سەرەكە، قوبالجىما، سابىرلى بول. مەن ەشقانداي ەسكەرتۋ جاسامايمىن. كولىك جۇرگىزۋ كەزىندە جۇرگىزۋشىگە ەسكەرتۋ جاساۋدىڭ قانداي بولاتىنىن بىلەمىن»، دەدى.
ءليمۋزيندى قونايەۆ ەكى جىل مىنگەن. 1978 جىلى وعان زيل-115 كولىگى بەرىلدى. ەسكى كولىك ۇزاق جىلدار مەملەكەتتىك گاراجدا ساقتالىپ، كەيىن جامبىل وبلىسىنىڭ باسشىلىعىنا بەرىلەدى. ودان كەيىن تارازدىق كاسىپكەرلەر ونى 20 مىڭ دوللارعا ساتىپ الادى. ولار كولىكتى 1996 جىلى د.قونايەۆ قورىنا تاپسىرعانىمەن، 2003 جىلى ول قايتادان جەكەنىڭ قولىنا ءوتىپ كەتكەن. كونەنىڭ كوزى اقىرى وتكەن جىلى عانا قورعا قايتارىلدى. قور باسشىلىعى الداعى ۋاقىتتا زيل-114 اۆتوكولىگىن «قونايەۆ ورتالىعى» تاريحي كەشەنىنە سىيعا تارتپاق. ايتا كەتەيىك، بۇل نىسان قونايەۆ قالاسىندا سالىنادى. ەرەكشە كولىك تاريحي كەشەننىڭ ەڭ باستى جادىگەرى بولاتىنى ءسوزسىز.