الماتىلىق اۆتوكولىك يەلەرى ديزەل تاپشىلىعىن سەزىنە باستادى.
ءبىراق قالالىق كاسىپكەرلىك جانە ينۆەستيسيالار باسقارماسى بولسا، قالادا ديزەل تاپشىلىعى جوق دەپ مالىمدەدى. ال كەيبىر جانارماي قۇيۋ بەكەتتەرىندەگى قالىپتاسقان كەزەك وزگە وڭىرلەردەن جۇك كولىكتەرىنىڭ كەلۋىنە بايلانىستى بولعان، دەپ حابارلايدى Almaty-akshamy.kz 24.kz سايتىنا سىلتەمە جاساپ.
«قازىرگى ۋاقىتتا قالا اكىمدىگى ەنەرگەتيكا مينيسترلىگىمەن بىرلەسىپ الماتىنى ديزەلدىك وتىنمەن قامتاماسىز ەتۋ جۇمىسىن اتقارىپ جاتىر. جانارمايدى كوتەرمە ساۋدا ارقىلى بەرۋشىلەرمەن جانە قازاقستان تەمىر جولى ۇلتتىق كومپانياسىمەن ءونىمدى جەتكىزۋدە ەشقانداي كەدەرگىلەردىڭ بولماۋى ءۇشىن ماسەلەنى نازارعا الدىق. ديزەل تاپشىلىعى جوق»، - دەيدى قالالىق كاسىپكەرلىك جانە ينۆەستيسيالار باسشىسىنىڭ ورىنباسارى قانات ساعىندىقوۆ.
تۇرعىنداردىڭ ايتۋىنشا، ديزەلدىك جانارماي تەك تالونمەن عانا قۇيىلادى. ال تالون تابۋدىڭ ءوزى قيىن. ونى ادەتتە جانارماي قۇيۋ بەكەتتەرىمەن الدىن الا كەلىسىم جاسايتىن مەكەمەلەر مەن كومپانيالار ساتىپ الادى.
«مەنىڭ موپەدىم ديزەلمەن جۇرەدى. ديزەل ىزدەپ قالانى شارلاپ، 5 جانارماي قۇيۋ بەكەتىنە باردىم»
«ەكى جەتىدەن بەرى كەرەكتى ديزەلدى قۇيا الماي ءجۇرمىن. مىنا جانار-جاعارماي قۇيۋ بەكەتىنە كۇندە كەلەمىن. ولار ەرتەڭ بولادى دەپ ايتادى. الايدا بۇگىن دە جوق»، - دەيدى تۇرعىندار.