قازاقستان رەسپۋبليكاسى مادەنيەت جانە اقپارات مينيسترلىگى، ءدىن ىستەرى كوميتەتىنىڭ قولداۋىمەن 16-20 قىركۇيەك ارالىعىندا رەسپۋبليكالىق ءاقپاراتتىق-تۇسىندىرۋ توبى الماتى قالاسىنا ءىس-ساپار جاسادى، دەپ حابارلايدى aqshamnews.kz
بۇل ءىس-ساپاردىڭ باستى ماقساتى – حالىقتىڭ ءدىنتانۋ سالاسىنداعى ساۋاتتىلىعىن ارتتىرۋ، مەملەكەت ۇستانىپ وتىرعان ءدىن ساياساتىن ءتۇسىندىرۋ جانە قوعامدا جالعان ءدىني يدەيالاردىڭ تارالۋىنىڭ الدىن الۋ مەن ءدىني ەكسترەميزمدى بولدىرماۋ.
ءدىني ەكسترەميزم – بۇل ءدىني كوزقاراستاردى راديكالدى تۇردە ناسيحاتتاپ، قوعامنىڭ تۇراقتىلىعىنا جانە قاۋىپسىزدىگىنە ءقاۋىپ توندىرەتىن ىس-ارەكەت. ءدىني ەكسترەميستەر كوبىنەسە زورلىق-زومبىلىقتى، قاقتىعىستاردى جانە مەملەكەتكە قارسى ارەكەتتەردى قولدايدى. ولار وزدەرىنىڭ ءدىني يدەيالارىن ءابسوليۋتتى شىندىق رەتىندە قابىلداپ، قوعامدى وسى يدەيالار نەگىزىندە قايتا قۇرۋعا تىرىسادى. ءدىني ەكسترەميزم اسىرەسە جاستار اراسىندا كەڭ تارالۋى مۇمكىن، ويتكەنى ولار ءالسىز، ەموسياعا بەيىم توپ بولىپ تابىلادى.
تەرروريزم – بۇل ەكسترەميستىك توپتاردىڭ زورلىق-زومبىلىق جانە قورقىتۋ ادىستەرىن قولدانۋ ارقىلى ساياسي، الەۋمەتتىك نەمەسە ءدىني ماقساتتارعا جەتۋ ءادىسى. تەرروريستىك ارەكەتتەر قوعامداعى ۇرەي تۋدىرۋدى جانە مەملەكەتتىك قۇرىلىمداردى بۇزۋدى كوزدەيدى. تەرروريزمدى ءدىني ەكسترەميستىك توپتار ءجيى قولدانادى، ولار وزدەرىنىڭ يدەيالارىن كۇشتەپ ەندىرۋدى ماقسات تۇتادى.
ءىس-ساپار بارىسىندا جالپى سانى 20 ءىس-شارا ۇيىمداستىرىلىپ، 1000-نان استام ادام قامتىلدى. ءىس-شاراعا قاتىسۋشىلار ءدىني ەكسترەميزم مەن تەرروريزمنىڭ قوعامعا زيانىن ءتۇسىندىرىپ، جاستاردى وسى يدەيالاردان قورعاۋ، ءدىني ساۋاتتىلىقتى ارتتىرۋ جانە حالىق اراسىندا دۇرىس اقپارات تاراتۋ ماقساتىندا جۇمىس جۇرگىزدى.
ءىس-شاراعا بەرىكبايەۆ ەلنار عالىمجان ۇلى – ق ر پرەزيدەنتى جانىنداعى جاستار كەڭەسىنىڭ مۇشەسى، ءال-فارابي اتىنداعى قازۇۋ اعا وقىتۋشىسى، ءدىنتانۋشى، PhD دوكتورى، ءالىپ تۇرسىنعالي تورەعالي ۇلى – رەسپۋبليكالىق ءاقپاراتتىق-تۇسىندىرۋ توبىنىڭ مۇشەسى، الەۋمەتتىك عىلىمدار ماگيسترى، ءدىنتانۋشى، سارسەمبايەۆ رۋسلان مەيرجانوۆيچ – ءال-فارابي اتىنداعى قازۇۋ اعا وقىتۋشىسى، ءدىنتانۋشى جانە ت.ب. ماماندار قاتىسىپ ءوز تاجىريبەلەرىمەن ءبولىستى.
ءىس-شارا «جاۋحار» قوعامدىق قورىنىڭ ۇيىمداستىرۋىمەن جۇزەگە اسىرىلدى.