الماتىدا قالانىڭ دەنساۋلىق ساقتاۋ جۇيەسىنىڭ وسى جىلدىڭ 9 ايىنداعى جۇمىس ناتيجەلەرىن تالقىلاۋعا ارنالعان القا وتىرىسى ءوتتى، دەپ حابارلايدى aqshamnews.kz
جيىنعا قالا اكىمىنىڭ ورىنباسارى نۇرلان ءابدىراحىم ءتوراعالىق ەتتى.
قالالىق قوعامدىق دەنساۋلىق ساقتاۋ باسقارماسىنىڭ باسشىسى مارات پاشيموۆ اتقارىلعان جۇمىستار تۋرالى ەسەپ بەردى.
وتىرىستا سونداي-اق، «الەۋمەتتىك مەديسينالىق ساقتاندىرۋ قورى» جەكە اكسيونەرلىك قوعامى الماتى قالالىق فيليالىنىڭ ديرەكتورى ءىلياس مۇحامەدجان، الماتى قالاسى بويىنشا سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى قاسىمحان الپىسباي ۇلى جانە ق ر دسم مەديسينالىق جانە فارماسيەۆتيكالىق باقىلاۋ كوميتەتىنىڭ الماتى قالاسى بويىنشا دەپارتامەنتىنىڭ باسشىسى دامير داۋلەتبايەۆ بايانداما جاسادى.
قالادا دەنساۋلىق كورسەتكىشتەرى بويىنشا تۇراقتى وڭ ديناميكا بايقالادى. جالپى ادام ءولىمى 0،75%-عا تومەندەپ، رەسپۋبليكالىق ورتاشا دەڭگەيدەن 21%-عا تومەن كورسەتكىشتى ساقتاپ وتىر.
بيىلعى 9 ايدا الماتىدا انا ءولىمى تىركەلگەن جوق، ال نارەستە ءولىمى 21،8%-عا تومەندەدى. بۇل ەل بويىنشا ەڭ جاقسى كورسەتكىشتەردىڭ ءبىرى.
قان اينالىم جۇيەسى اۋرۋلارىنان (–4،9%)، ونكولوگيالىق اۋرۋلاردان (–13%)، تۋبەركۋلەزدەن (شامامەن ەكى ەسەگە)، جاراقاتتار مەن جازاتايىم جاعدايدان (–11%) بولاتىن ءولىم-جىتىم دە تومەندەپ كەلەدى.
الماتىنىڭ مەديسينا ۇيىمدارىندا 18،5 مىڭنان استام قىزمەتكەر ەڭبەك ەتەدى، ونىڭ ىشىندە 5 مىڭنان استام دارىگەر جانە 10 مىڭنان استام ورتا بۋىن ماماندار. دارىگەرلەرمەن قامتىلۋ دەڭگەيى – 91،5%، ورتا مەديسينالىق قىزمەتكەرمەن قامتىلۋ – 90،5%.
جىل سايىن قالا مەديسينا ۇيىمدارىنا 400-دەن استام جاس مامان جۇمىسقا ورنالاسادى. بۇل كادر تاپشىلىعىن كەزەڭ-كەزەڭمەن ازايتۋعا جانە جۇيەنىڭ كاسىبي الەۋەتىن نىعايتۋعا ىقپال ەتەدى.
الماتىدا مەديسينالىق مامان تاپشىلىعىن تومەندەتۋ بويىنشا شارالار جۇزەگە اسىرىلىپ كەلەدى. 2025 جىلى قالاداعى مەديسينالىق جوعارى وقۋ ورىندارىندا 319 رەزيدەنت ءبىلىم الىپ ءجۇر، ونىڭ 124ء-ى بيىل تۇسكەن. 2024–2025 وقۋ جىلىنا اكىمدىكتىڭ مەملەكەتتىك تاپسىرىسى بويىنشا تەحنيكالىق جانە كاسىپتىك ءبىلىم بەرۋ باعدارلامالارىنا 1 216 ستۋدەنت قابىلدانعان.
الماتىدا 2030 جىلعا دەيىن دەنساۋلىق ساقتاۋ ينفراقۇرىلىمىن جاڭعىرتۋدىڭ كەزەڭدىك جوسپارى ىسكە اسۋدا. ەكى العاشقى مەديسينالىق-سانيتارلىق كومەك ورتالىعى، جەدەل جاردەم قوسالقى ستانساسى جانە ەمحانا قۇرىلىسى اياقتالۋعا جاقىن. سونداي-اق، №4 قكا، №7 قكا جانە №1 پەرزەنتحانا جوندەلىپ جاتىر.
2026 جىلدان باستاپ كوپسالالى اۋرۋحانالار، بالالار كلينيكالىق ورتالىقتارى، ونكوورتالىق جانە پەريناتالدىق ورتالىقتى قامتيتىن توعىز جاڭا نىساننىڭ قۇرىلىسى جوسپارلانعان.
مەديسينالىق تەحنيكامەن قامتاماسىز ەتىلۋ دەڭگەيى 93،9%.
بيىل قالا مەديسينا ۇيىمدارى ءۇشىن شامامەن 3000 بىرلىك زاماناۋي جابدىق ساتىپ الۋ كوزدەلگەن.
2025 جىلى تەلەمەديسينا، جاساندى ينتەللەكت جانە قاشىقتان دەنساۋلىق مونيتورينگىن بىرىكتىرەتىن Almaty Digital Medical Center (ADMC) سيفرلىق مەديسينا ورتالىعى ىسكە قوسىلدى. پاسيەنتتەردى Face ID ارقىلى سايكەستەندىرۋ، ەلەكتروندى اۋرۋحانا پاراعى، انىقتامالار جانە ت.ب. ەنگىزىلدى.
قاشىقتان كورسەتىلەتىن مەديسينالىق قىزمەت سانى 236 مىڭعا جەتتى. ونكوورتالىقتا حيميوپرەپاراتتاردى روبوتتاندىرىلعان دايىنداۋ جۇيەسى ىسكە قوسىلدى، ال ەمحانالاردا جاساندى ينتەللەكت ەلەمەنتتەرى بار داۋىس كومەكشىلەرى جۇمىس ىستەي باستادى.
الماتى مەديسينالىق تۋريزم ورتالىعى رەتىندەگى پوزيسياسىن دا نىعايتىپ كەلەدى. 2025 جىلدىڭ 9 ايىندا قالا ستاسيونارلارىندا تمد ەلدەرىنەن، رەسەي، وزبەكستان جانە قىرعىزستاننان كەلگەن 279 شەتەلدىك ناۋقاس ەمدەلدى. ەڭ سۇرانىسقا يە باعىتتار – پەريناتولوگيا، ونكولوگيا، وفتالمولوگيا، حيرۋرگيا جانە ۋرولوگيا.
قالاداعى 29 مەديسينالىق ۇيىم 59 باعىت بويىنشا جوعارى تەحنولوگيالىق كومەك كورسەتەدى. بۇل وتكەن جىلعا قاراعاندا 7%-عا ارتىق. مۇنداي كومەكتى 4 800-گە جۋىق پاسيەنت الدى.
نەگىزگى باعىتتار – كارديوحيرۋرگيا، نەيروحيرۋرگيا، اكۋشەرلىك-گينەكولوگيالىق كومەك، ەكو جانە كارديوۆەرتەر-دەفيبريللياتورلار يمپلانتاسياسى.
قورىتىندى سوزىندە الماتى قالاسى اكىمىنىڭ ورىنباسارى نۇرلان ءابىدراحىم قالانىڭ دەنساۋلىق ساقتاۋ جۇيەسىنىڭ باستى باعىتتار بويىنشا تۇراقتى دامۋ جانە وڭ ناتيجە كورسەتىپ وتىرعانىن اتاپ ءوتتى. ول مەديسينالىق كومەكتىڭ ساپاسى مەن قولجەتىمدىلىگىن ارتتىرۋ، بيۋدجەت قاراجاتىن ءتيىمدى پايدالانۋ، سيفرلىق تەحنولوگيا ەنگىزۋ جانە بىلىكتى كادرلاردى دايارلاۋ جۇمىستارىن جالعاستىرۋدىڭ ماڭىزىن اتاپ ءوتتى.
اكىم ورىنباسارىنىڭ ايتۋىنشا، اۋرۋلاردى ەرتە الدىن الۋ، ينفراقۇرىلىمدى دامىتۋ جانە ۇلتتىق ينديكاتورلاردىڭ تولىق ورىندالۋىن قامتاماسىز ەتۋگە ەرەكشە نازار اۋدارۋ قاجەت.