الماتى 4-6 قاراشا ارالىعىندا ExCeL London كەشەنىندە وتكەن World Travel Market (WTM) London 2025 حالىقارالىق تۋريستىك كورمەسىندە قازاقستاننىڭ تۋريستىك الەۋەتىن تانىستىردى، دەپ حابارلايدى aqshamnews.kz
بۇل تۋريزم يندۋسترياسىنداعى ەڭ ءىرى وقيعالاردىڭ ءبىرى، وندا جىل سايىن ءتۇرلى ەل مەن كومپانيا وكىلدەرى باس قوسادى.
الماتىنىڭ كورمەگە قاتىسۋى قالانى ورتالىق ازيانىڭ زاماناۋي، ءقاۋىپسىز ءارى شابىت بەرەتىن تۋريستىك باعىتى رەتىندە تانىتۋعا باعىتتالدى. قالا ءوزىن ىلە الاتاۋ تاۋ سىلەمدەرىنە باستايتىن قاقپا عانا ەمەس، مادەنيەت، گاسترونوميا جانە وقيعالىق تۋريزم ورتالىعى رەتىندە كورسەتۋدى كوزدەيدى.
2025 جىلى الماتىعا قىزىعۋشىلىق ارتا ءتۇستى: العاشقى التى ايدا قالاعا 1،14 ميلليوننان استام تۋريست كەلگەن. ونىڭ ىشىندە 320 مىڭنان كوبى – شەتەلدىك قوناقتار. اسىرەسە، ۇلىبريتانيادان كەلۋشىلەر سانى 16%-دان استام ءوستى.
«WTM London – الماتىنى الەمگە جاڭا قىرىنان شىعىس ءداستۇرى مەن مەگاپوليس ىرعاعى توعىسقان قالا رەتىندە تانىستىرۋعا مۇمكىندىك بەرەدى. ءبىز الماتىنىڭ جىلىلىق، تابيعات جانە شابىت سيمۆولىنا اينالعانىن قالايمىز»، – دەدى قالانىڭ تۋريزم باسقارماسى.
الماتىنىڭ كورمە ستەندىندە قوناقتار قالا مادەنيەتى مەن رۋحىن سەزىندى: دومبىرا مەن قوبىزدىڭ اۋەنى شىرقالىپ، قازاق باتىرلارى ونەر كورسەتتى، قوناقتار قازى، باۋىرساق، جەنت جانە قىمىز سياقتى ۇلتتىق تاعامداردىڭ ءدامىن تاتتى.
سونىمەن قاتار كورمە حالىقارالىق تۋروپەراتورلارمەن، اۋە كومپانيالارمەن جانە مەديا وكىلدەرىمەن جاڭا ىسكەرلىك بايلانىس ورناتۋعا ارنالعان الاڭ بولدى. اسىرەسە، تۇراقتى تۋريزمگە جانە MICE-تۋريزمگە (ىسكەرلىك ءىس-شارالار ءتۋريزمى) دامىتۋعا، سونداي-اق الماتىنى ساياحاتشىلار ءۇشىن بارىنشا جايلى ەتەتىن ينفراقۇرىلىمدىق جوبالارعا باسا نازار اۋدارىلدى.