ەلىمىزدىڭ ماڭىزدى وقيعاسىنان شەت قالماي، ءوز تاڭداۋىن جاساۋعا كەلگەن قالا تۇرعىندارىنىڭ كوڭىل-كۇيى كوتەرىڭكى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
الماتىدا كەزەكتەن تىس پرەزيدەنتتىك سايلاۋعا ۇسىنىلعان ۇمىتكەرلەرگە داۋىس بەرۋ باستالدى. بۇگىن قالاداعى ۋچاسكەلەر اشىلماي جاتىپ، ءوز تاڭداۋىن جاساۋعا كەلگەن الماتىلىقتاردىڭ قاراسى قالىڭ بولدى.
الماتىدا العاشقى سايلاۋ ۋچاسكەسى تاڭعى ساعات 6.00-دە اشىلدى. ال داۋىس بەرۋ سايلاۋ زاڭناماسىندا بەكىتىلگەن ءتارتىپ بويىنشا ساعات 7.00-دە باستالدى. ەل تاريحىنداعى ەلەۋلى وقيعاعا بەيجاي قاراماي، ءوز داۋسىن بەرۋگە كەلگەن قالا تۇرعىندارىنىڭ كوڭىل-كۇيى وتە جاقسى.
«بۇگىن - ەرەكشە كۇن، ق ر پرەزيدەنت سايلاۋى. بۇل - ساياسي وقيعا. بۇل - ءبىزدىڭ بولشاعىمىز. مەن كەشەلى بەرى اتالعان ناۋقانعا دايىندالدىم. الماتىدا جاۋىن جاۋىپ تۇر، سوعان قاراماستان، ەڭ ءبىرىنشى بولىپ سايلاۋ ۋچاسكەسىنە كىردىم. سونىڭ ارقاسىندا سىيلىققا يە بولدىم»،- دەيدى الماتى تۇرعىنى.
№ 254 سايلاۋ ۋچاسكەسى كوميسسياسىنىڭ ءتوراعاسى باقىتجامال وسپانوۆانىڭ ايتۋىنشا، سايلاۋشىلارعا بارلىق جاعداي جاسالعان.
«ءبىزدىڭ سايلاۋ ۋچاسكەسىندە 1799 ادام تىركەلگەن. جالپى، 1817 بيۋللەتەن بەرىلدى. ءتورت ادام ەسەپتەن شىعارۋ كۋالىگىن الدى. الماتىلىقتار تاڭمەن تالاسا كەلىپ، بەلسەندى اتسالىسىپ جاتىر. 10-نان استام بايقاۋشى جۇمىس ىستەۋدە. بارلىق سايلاۋ نورمالارىن قاتاڭ قاداعالايمىز»، - دەيدى باقىتجامال وسپانوۆا.