2022 جىلى 8-9 جەلتوقسان كۇندەرى قۇرمانعازى اتىنداعى قازاق ۇلتتىق كونسەرۆاتورياسىندا ق ر ەڭبەك سىڭىرگەن قايراتكەرى، پروفەسسور ساحاربايەۆا كاريما سۇندەت قىزىنىڭ 70 جىلدىق مەرەيتويىنا وراي «ءححى عاسىرداعى ءداستۇرلى مۋزىكا: زەرتتەۋ ماسەلەلەرى» اتتى حالىقارالىق عىلىمي-پراكتيكالىق كونفەرەنسياسىن جانە «ءداستۇرلى ونەر – التىن ارقاۋ» اتتى كونسەرتى وتەدى، دەپ حابارلايدى Almaty-akshamy.kz.
شارا اياسىندا ايتقالي جايىموۆ، ءبىلال ىسقاقوۆ، كاريما ساحاربايەۆا، ارمان جايىمنىڭ بىرىگىپ شىعارعان «دومبىرا سازى» كىتابىنىڭ تۇساۋكەسەرى جانە ونەر قايراتكەرلەرى مەن زەرتتەۋشى عالىمداردىڭ شەبەرلىك سىنىپتارى دا وتپەك.
مەرەيتويلىق كونسەرتتە قۇرمانعازى اتىنداعى قازاق ۇلتتىق وركەسترى – باس ديريجەرى ا. تىلەپبەرگەنوۆ، ديريجەر ق ر ەڭبەك سىڭىرگەن قايراتكەرى ا. جايىموۆ، قىرعىزستاننىڭ حالىق ءارتيسى ر. امانوۆا، ق ر ەڭبەك سىڭىرگەن ءارتيسى ر. ايداربايەۆا، قىرعىزستاننىڭ ەڭبەك سىڭىرگەن ءارتيسى س. كوچەربايەۆ، كونسەرۆاتوريا ۇستازدارى ق. جۇماعالي، ءا. الينا، ت. سادەنوۆ، ا. قويشىبايەۆ جانە ارداگەر-ۇستازدىڭ شاكىرتتەرى ونەر كورسەتەدى. كونسەرتتى مادەنيەت قايراتكەرى، «قۇرمەت» وردەنىنىڭ يەگەرى ابدۋلحاميت رايىمبەرگەنوۆ جۇرگىزەدى.
ساحاربايەۆا كاريما سۇندەت قىزى – قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى، كۇيشى-ۇستاز، ونەر زەرتتەۋشىسى، ق ر ەڭبەك سىڭىرگەن قايراتكەرى، ماحامبەت اتىنداعى سىيلىقتىڭ يەگەرى، حالىقارالىق «تۇرىكسوي» بىرلەستىگىنىڭ مۇشەسى. ك.ساحاربايەۆا حالىق مۋزىكاسى فاكۋلتەتى قۇرامىندا فولكلورلىق سازسىرناي، جەتىگەن اسپاپتارىنىڭ ماماندىق كلاستارىن اشتى. فاكۋلتەتتىك ۇلت اسپاپتار وركەسترى، انسامبلدەرى، جەكە ورىنداۋشىلار ۇجىمىن باسقارىپ گاسترولدىك ساپارمەن گەرمانيا، اۆستريا، جۇڭگو، تۇركيا، رەسەي، ت.ب. كوپتەگەن شەت ەلدەردە قازاق مۋزىكاسىن ناسيحاتتادى. وقۋ-ادىستەمەلىك، عىلىمي-زەرتتەۋشىلىك، كۇيتانۋشىلىق سالاسىندا «دومبىرا-داستان» دومبىرا مەن فورتەپياناعا ارنالعان ءبىرقاتار مونوگرافيالىق ەڭبەكتەردىڭ اۆتورى. كۇيشى-كومپوزيتور ق.احمەدياروۆتىڭ شىعارماشىلىعىن، وي-تولعامدارىن، كۇيلەرىنىڭ شىعۋ تاريحىن، ورىنداۋشىلىق شەبەرلىگىن، جان-جاقتى زەرتتەپ، «تابىنۋ»، «شىنار»، «كۇي-ۇران»، «كۇي-تولعاۋ» ەڭبەكتەرىن قۇراستىرىپ شىعاردى. مەملەكەتتىك «مادەني-مۇرا» باعدارلاماسى اياسىندا كونسەرۆاتوريا مەن م. اۋەزوۆ اتىنداعى «ادەبيەت جانە ونەر» ينستيتۋتى بىرلەستىگىندە شىققان «قازاق مۋزىكاسىنىڭ انتولوگياسى» كوپ تومدىعى اۆتورلارىنىڭ ءبىرى.
كونفەرەنسياعا – وتاندىق جانە شەتەلدىك مۋزىكا زەرتتەۋشىلەرى، مۋزىكالىق جوو-نىڭ جانە مۋزىكا كوللەدجدەرىنىڭ وقىتۋشىلارى، ءداستۇرلى مۋزىكا ورىنداۋشىلارى مەن تاۋەلسىز زەرتتەۋشىلەر قاتىسادى.