الماتىدا دارىندى بالالاردىڭ كونسەرتى ءوتتى

شاراعا 200-دەن استام وقۋشى قاتىستى.

الماتىدا احمەت جۇبانوۆ اتىنداعى دارىندى بالالارعا ارنالعان رەسپۋبليكالىق مەكتەپ-ينتەرناتى تاربيەلەنۋشىلەرىنىڭ ەسەپتىك گالا كونسەرتى ءوتتى، دەپ حابارلايدى Almaty-akshamy.kz Almaty.tv سىلتەمە جاساپ. 

ءىس-شاراعا 200-دەن استام وقۋشى قاتىسىپ، ءدۇيىم جۇرتقا ءوز ونەرلەرىن پاش ەتتى. شىعارماشىلىق جولدا جۇرگەن جاس تالانتتار حالىقتىق جانە سيمفونيالىق وركەسترمەن ۇلتتىق، الەمدىك كلاسسيكالاردان سىر شەرتىپ، كورەرمەندى تاڭداي قاقتىردى. 

«بالالاردىڭ ونەرىن حالىققا كورسەتكەنىمىزگە قۋانىشتىمىز. ويتكەنى سوڭعى كونسەرت 2019 جىلى 2،5 جىل بۇرىن بولعان ەكەن. دەگەنمەن بالالاردىڭ جەتىستىگى كوپ»، – دەدى ا.جۇبانوۆ اتىنداعى رەسپۋبليكالىق مۋزىكا مەكتەبىنىڭ ديرەكتورى نۇركەن ءاشىروۆ. 

اتالمىش كونسەرت بالالار جىلى اياسىندا ءوتتى. ۇيىمداستىرۋشىلار الداعى ۋاقىتتا دا جاس ونەرپازداردىڭ تالانتىن اشۋ ءۇشىن حالىقارالىق كونكۋرستار وتكىزۋدى جوسپارلاپ وتىر. سەبەبى مۇنداعى ءار بالانىڭ ارمانى بيىك، ماقساتى ايقىن.  

«بولاشاق ارمانىم – قازاقتىڭ ونەرىن كۇللى الەمگە تانىتۋ. وسى مەكتەپتى ءبىتىرىپ، جوعارى وقۋ ورنىنا ءتۇسىپ، قازاقتىڭ ونەرىن الەمگە تانىتقىم كەلەدى»، – دەدى جاس ونەرپاز نۇرداۋلەت ءابدىقادىروۆ.