الماتى مەملەكەتتىك قۋىرشاق تەاترى قازاقستاندىق بوكسشى، سيدنەي وليمپياداسىنىڭ چەمپيونى بەكزات ساتتارحانوۆتىڭ باتىل رۋحىنا ارنالعان «چەمپيون» قويىلىمىنىڭ پرەمەراسىن تەاتر سۇيەر قاۋىمنىڭ نازارىنا ۇسىندى.
بۇل سپەكتاكل ارمانعا دەگەن ادالدىق، ماقساتقا جەتۋ جولىنداعى قاجىرلى ەڭبەك، ەلى مەن جەرىنە دەگەن سۇيىسپەنشىلىكتى ناسيحاتتايتىن قويىلىم جاس جەتكىنشەكتەردى قايسارلىققا، وجەتتىلىككە، باتىلدىققا، شىدامدىلىققا تاربيەلەيدى.
قۋىرشاق تەاترى ساحناسىندا تۇڭعىش رەت ۇسىنىلاتىن قويىلىمنىڭ ەرەكشەلىگى – بولمىسى بولەك بوكس شەبەرى، ۇلت ماقتانىشى، نەبارى 20 جىلدىق عۇمىرىندا 143 جەكپە-جەك وتكىزگەن ءبىرتۋار بوكسشىنىڭ اسقاق رۋحىن قۋىرشاق وبرازىندا كورسەتۋ. كينەماتوگرافيا ەلەمەنتتەرىن ۇتىمدى پايدالانا وتىرىپ، ءار داۋىردەگى قازاق حالقىنىڭ جەڭىسى مەن جەڭىلىسىن ءتۇرلى سيمۆوليكالىق وبرازدار ارقىلى تاريحي فاكتىلەرمەن بايلانىستىرا قابىستىرىلعان قويىلىم بەكزات ساتتارحانوۆتىڭ كۇرەسى ارقىلى كۇللى ۇلت تاريحىن باياندايدى.
«ءۇش-تورت جىل بۇرىن بەلگىلى اقىن باقىت بەدەلحان اعامىز قۋىرشاق تەاترىنان تاپسىرىس ءتۇسىپ تۇر، سونى سەن جازساڭ دەپ ماعان قولقا سالدى. بۇرىن سپورت تۋرالى جازباعانمىن، بالالار تاقىرىبىندا ەكى ەسە قيىن. ءبىراز تارتىنشاقتاپ ءجۇردىم دە، اقىرىنداپ باستاپ، جازىپ بەردىم. ءبىراق ودان كەيىن پاندەميا بولدى، سوندىقتان 3 جىل وتكەننەن كەيىن پەسا ساحنالانايىن دەپ جاتىر. ءبىز بەكزات ارقىلى قازىرگى بالالارعا رۋح دەگەنىمىز نە، نامىس دەگەن قانداي بولادى، ەرىك پەن كۇشتىڭ قۋاتى سىندى قۇندىلىقتاردى تۇسىندىرگىمىز كەلدى»، – دەدى «چەمپيون» پەساسىنىڭ اۆتورى، دراماتۋرگ الىبەك بايبول.
جاسوسپىرىمدەر اۋديتورياسىنا ارنالىپ دايىندالعان دراما جانرىنداعى قويىلىمنىڭ رەجيسسەرى – قازاقستاننىڭ ەڭبەك سىڭىرگەن قايراتكەرى، تەاتر ارداگەرى ءورازالى اقجارقىن-سارسەنبەك، اۆتورى – حالىقارالىق «الاش» ادەبي سىيلىعىنىڭ جۇلدەگەرى، دراماتۋرگ الىبەك بايبول، سۋرەتشىسى – يۋليا چەرنوۆا، انۋار بۇركىتبايەۆ، مۋزىكامەن كوركەمدەۋشى – باقبەرگەن بايشىعاش، حورەوگرافى – اننا سوي.
«تەاتردىڭ ءتىلى ءبىر-اق ءتىل، ول – رۋحاني ءتىل. بۇگىنگى سپەكتاكل بۇل شەكسپير ەمەس، باسقا ءبىر عۇلاما دراماتۋرگتىڭ شىعارماسى ەمەس. سوندىقتان دا ونىڭ سالماعى اۋىر، كەشە عانا كوز الدىمىزدا جۇرگەن قازاقستان تاريحىندا اتى قالعان بەكزات باۋىرىمىز جايىندا. ەگەر كىمدە كىم بەكزاتتىڭ قالاي چەمپيون بولعانىن كورگىسى كەلسە، وندا الەۋمەتتىك جەلىدەگى فينالدى اشادى. بۇل بەكزات قالاي چەمپيون بولدى دەگەن سۇراققا جاۋاپ بەرەدى. ال ءبىزدىڭ قويىلىم «نەگە چەمپيون بولدى» دەگەن سۇراققا جاۋاپ بەرەدى. ونداعى ايتاتىن جاۋابىمىز – قازاق حالقىنىڭ رۋحى. قويىلىمدا ءبارى بار – ساقتار دا، «اقتابان شۇبىرىندى، القاكول سۇلاما» دا، رەپرەسسيا دا. بۇل سپەكتاكل ادامنىڭ جانىنا ازىق بەرەتىن قويىلىم. ءار سپەكتاكل اقىل، وي-سانا، تۇيسىگىمىزگە وي سالۋى كەرەك. جاي عانا كۇلىپ، جاي عانا جىلاپ كەتۋ كەرەك ەمەس. مىنا سپەكتاكلدى كورگەن 200 بالانىڭ ەكەۋى ويلانىپ كەتەتىن بولسا، وندا ءبىزدىڭ ماقساتىمىزدىڭ ورىندالعانى»، – دەدى قويىلىم رەجيسسەرى، قازاقستاننىڭ ەڭبەك سىڭىرگەن قايراتكەرى ءورازالى اقجارقىن-سارسەنبەك.