الماتى پوليسياسى تاسىمالداۋشىلاردى جەكە جاۋاپكەرشىلىككە شاقىرادى.
الماتىدا جولاۋشىلار تاسىمالى سالاسىنداعى قاۋىپسىزدىكتى قامتاماسىز ەتۋ ماقساتىندا «تاسىمالداۋشى» جەدەل-الدىن الۋ ءىس-شاراسى جۇرگىزىلۋدە، دەپ حابارلايدى aqshamnews.kz.
Polisia.kz مالىمەتىنشە، بۇل شارا جولاۋشىلاردىڭ قاۋىپسىزدىگىن ارتتىرۋعا جانە قوعامدىق كولىكتەردەگى قۇقىق بۇزۋشىلىقتاردى بولدىرماۋعا باعىتتالعان. ءىس-شارا بارىسىندا پوليسيا قىزمەتكەرلەرى كولىك قۇرالىن ماس كۇيىندە باسقارۋ، جۇرگىزۋشى كۋالىگىنەن ايىرىلعانداردىڭ كولىك جۇرگىزۋى، ۇيالى تەلەفوندى پايدالانۋ، سونداي-اق توقتاۋ مەن تۇراق ەرەجەلەرىن بۇزۋ دەرەكتەرىن انىقتاۋعا باسا نازار اۋدارۋدا. شارانىڭ باستى ماقساتى – قوعامدىق كولىكتەگى كەز كەلگەن قۇقىق بۇزۋشىلىققا «مۇلدەم توزبەۋشىلىك» قاعيداتىن ەنگىزۋ، زاڭنامانى ساقتاۋ جانە قاۋىپسىزدىك دەڭگەيىن جوعارىلاتۋ. الماتى قالالىق پوليسيا دەپارتامەنتىنىڭ دەرەكتەرىنە سۇيەنسەك، وتكەن جىلى جولاۋشىلار كولىگى جۇرگىزۋشىلەرىنىڭ كىناسىنەن 320 جول-كولىك وقيعاسى تىركەلگەن. سونىڭ سالدارىنان 379 ادام جاراقات الىپ، 6 ادام قازا تاپقان. جۇرگىزىلگەن تالداۋ كورسەتكەندەي، وسىنداي وقيعالاردىڭ نەگىزگى سەبەپتەرى جىلدامدىقتى شەكتەن اسىرۋ، مانيەۆر جاساۋ ەرەجەلەرىن بۇزۋ جانە كولىك جۇرگىزۋ كەزىندە ۇيالى تەلەفوندى پايدالانۋ بولىپ تابىلادى.
– شارا اياسىندا پوليسيا قىزمەتكەرلەرى جولاۋشىلار كولىگىن تەكسەرىپ، كولىك جۇرگىزۋشىلەرىنىڭ ءتارتىبىن ارتتىرۋعا كۇش سالۋدا. ءبىزدىڭ ماقسات – تەحنيكالىق اقاۋى بار نەمەسە زاڭسىز قايتا جابدىقتالعان كولىكتەردى پايدالانۋعا جول بەرمەۋ، جولاۋشىلار مەن جۇكتى تاسىمالداۋ كەزىندە زاڭنامانى ساقتاۋ جانە زاڭسىز جولاۋشىلار تاسىمالىنا توسقاۋىل قويۋ. بۇل جۇمىستارعا مەملەكەتتىك ورگاندار مەن ازاماتتىق قوعام وكىلدەرى بەلسەندى تۇردە تارتىلدى، – دەدى الماتى قالالىق پوليسيا دەپارتامەنتى اكىمشىلىك پوليسيا باسقارماسى باستىعىنىڭ ورىنباسارى دارحان ايىمبەتوۆ.
ەكى كۇننىڭ ىشىندە جولاۋشىلار كولىگى جۇرگىزۋشىلەرى جاساعان 382 جول ەرەجەسىن بۇزۋ دەرەگى انىقتالدى. سونىمەن قاتار تەحنيكالىق اقاۋى بار ءۇش كولىك ارنايى ايىپپۇل تۇراعىنا قويىلدى.