رەسپۋبليكا سارايىندا وتكەن شاراعا 40-تان استام جۇمىس بەرۋشى قاتىستى
الماتىدا مۇمكىندىگى شەكتەۋلى جاندارعا ارنالعان جۇمىس جارمەڭكەسى ءوتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
رەسپۋبليكا سارايىندا وتكەن شاراعا 40-تان استام جۇمىس بەرۋشى قاتىستى.
24 جاستاعى قاناعات تاسقارايەۆ – ورتا ءبىلىمدى زاڭگەر. ماماندىق بويىنشا 3 جىل وقىعان. تەك سودان بەرى وزىنە لايىقتى، تۇراقتى جۇمىس تاپپاي كەلەدى. بوس ورىنداردا كوپ جاعدايدا مۇمكىندىگى شەكتەۋلى جاندارعا جاعداي جاسالماعان. كوتەرىلىپ-شىعۋ بىلاي تۇرسىن، قاراپايىم قاجەتتىلىك دارەتحانا دا قاراستىرىلماعان.
«ۆاتساپ، الەۋمەتتىك مەسسەندجەرلەردەن «جارمەڭكە بولادى» دەپ وقىپ، مۇمكىندىكتى جىبەرىپ العىم كەلمەدى. جۇمىس ىزدەپ كەلدىم. جىلدىڭ اياعى بولسا دا، جۇمىس تابىلسا دەگەن نيەت قوي»، – دەدى قالا تۇرعىنى قاناعات تاسقارايەۆ.
جۇمىس جارمەڭكەسىندە قوناق ءۇي، جانارماي بەكەتتەرى، بيۋدجەتتىك مەكەمەلەر، بانكتەر جۇمىس ورىنىن ۇسىندى. جالپى ءىس-شارادا 150-گە جۋىق بوس جۇمىس ورنى تاڭداۋعا بەرىلدى. ال ۇسىنىلعان ورتاشا جالاقى - 150 مىڭ تەڭگە كولەمىندە.
«جۇمىس بەرۋشىلەر مۇددەلى بولىپ وتىر. ولاي دەيتىن سەبەبىمىز، قولادانىستاعى زاڭناماعا سايكەس، جالپى شتاتتىڭ 2 پايىزىنان 4 پايىزىنا دەيىن مۇمكىندىگى شەكتەۋلى جاندار جۇمىس جاساۋ كەرەك. بۇگىن وزدەرى ىنتا-نيەتىن ءبىلدىرىپ، جۇمىس بەرۋشىلەر كەلىپ جاتىر. كاسسير، كولل-ورتالىق وپەراتورى، سونداي-اق ىدىس جۋۋشى سياقتى جۇمىس تۇرلەرىن ۇسىنىپ جاتىر»، – دەدى مەدەۋ اۋداندىق مادەنيەت جانە تىلدەردى دامىتۋ ءبولىمىنىڭ باسشىسى ساكەن ارالبايەۆ.
مەدەۋ اۋدانىندا 3 مىڭنان اسا مۇگەدەك جان تۇرادى. سونىڭ 70 پايىزى جۇمىس ىستەۋگە قابىلەتتى. ولاردى جۇمىسقا ورنالاستىرۋ - قالا اكىمدىگىنىڭ باستى مىندەتى. ال ءاربىر وتكەن جارمەڭكەدە شامامەن 20-دان استام مۇمكىندىگى شەكتەۋلى جان ەكى قولعا ءبىر كۇرەك تاۋىپ كەلەدى.