الماتىدا اپاتتى جاعدايدا تۇرعان جەدەلساتىلار تولىعىمەن جويىلدى

تۇرعىندار ەندى جاڭا ءارى سوڭعى تەحنولوگياداعى كابينالاردى قولدانادى

الماتىدا اپاتتى جاعدايدا تۇرعان جەدەلساتىلار تولىعىمەن جويىلدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
قالالىق كوممۋنالدىق ينفراقۇرىلىمدى دامىتۋ باسقارماسىنىڭ مالىمەتىنشە، 25 جىلدان اسا ۋاقىت قىزمەت كورسەتكەن ءليفتىنىڭ بارلىعى جاڭاسىنا اۋىستىرىلعان. مۇنداي جاڭعىرتۋ، جۇمىستارى «نۇرلى جەر» باعدارلاماسىنىڭ اياسىندا جۇزەگە اسىپ جاتىر. بۇدان بىلاي الماتىداعى كوپ قاباتتى ۇيلەردە ەسكى جەدەلساتىلار بولمايدى. تۇرعىندار ەندى جاڭا ءارى سوڭعى تەحنولوگياداعى كابينالاردى قولدانادى.

«بيىل باعدارلاما بويىنشا الماتىدا 352 ليفت 169 ۇيدە اۋىسۋى كەرەك. ءقازىر سونىڭ 100 پايىزىن ورىندادىق. سونداي-اق بىزدە مودەرنيزاسيالاۋعا جاتاتىن 130 ءۇيدىڭ 76-سى ورىندالدى. ەندى 54 ءۇي قالدى، ونى جىل سوڭىنا دەيىن اتقارامىز»، – دەدى كوممۋنالدىق ينفراقۇرىلىمدى دامىتۋ باسقارماسىنىڭ باسشىسى.

جالپى، 5 جىلدان بەرى جىل سايىن 300-دەن اسا جەدەلساتى اۋىستىرىلىپ تۇرعان. ەندى جاڭارتۋ جۇمىستارىنىڭ ەسەبىنەن كەلەر جىلدان باستاپ 50-60 ليفت قايتا جاساقتالىپ وتىرادى. تۇرعىندار ءۇشىن ليفتىلەردى بىرنەشە وندىرۋشىدەن تاڭداپ الۋعا مۇمكىندىك جاسالعان. باستىسى ساپاسى مىقتى، 25 جىلعا دەيىن قىزمەت كورسەتسە بولعانى. ال اۋىستىرۋعا كەتەتىن قارجى 8 جىلدان 15 جىلعا دەيىنگى مەرزىمگە ءبولىنىپ، كوممۋنالدىق تولەمدەرگە قوسىلىپ وتىرادى.

«كەتەتىن شىعىندار ەسەپتەلىپ، شامامەن 8 ميللون تەڭگە شىقتى. باسىندا سومانى ەستىگەن تۇرعىندار ۇرەيلەنىپ ەدى. كەيىننەن قارجىنى 15 جىلعا بولگەندە، قالتانى قاقپايتىنى قۋانتتى. ماسەلەن، 4 بولمەلى پاتەر يەلەرى 3 مىڭ تەڭگە تولەيدى»، – دەدى ميب ءتوراعاسى ولگا لاپينا.

بۇدان بولەك مودەرنيزاسيالاۋ باعدارلاماسى اياسىندا ۇيگە كۇردەلى جوندەۋ جۇرگىزۋ جولى قاراستىرىلعان. ول ءۇشىن پاتەر يەلەرىنىڭ جارتىسىنان كوبى ءوز كەلىسىمىن بەرىپ، ءوتىنىش جازۋى ءتيىس.

«جازدا ءبىز ءۇيدىڭ شاتىرلارىن جاسايمىز. ال قازىرگىدەي ۋاقىتتا ىشكى جۇمىستارىن رەتتەيمىز. ياعني ينجەنەرلىك جەلىلەرىن، پودەزدەردەگى ەلەكتر سىمدارىن اۋىستىرامىز»، – دەدى كوممۋنالدىق ينفراقۇرىلىمدى دامىتۋ باسقارماسى باسشىسىنىڭ ورىنباسارى نۇربول قاجين.

بيىل قالادا 130 كوپ قاباتتى تۇرعىن ءۇي كۇردەلى جوندەۋدەن وتەدى. ال قۇرىلىسقا كەتەتىن قارجى كوممۋنالدىق تولەمدەر ارقىلى مەملەكەتكە بىرتىندەپ قايتاتىن بولادى.