الماتىنىڭ كوممۋنالدىق قىزمەتى جىلۋدىڭ اقشاسىن تولەمەگەن تۇرعىنداردان سوت ارقىلى قارىزىن ءوندىرىپ، تولىق وتەلگەنشە پاتەرىندەگى ىستىق سۋىن وشىرمەك. ءقازىردىڭ وزىندە ىستىق سۋ مەن جىلۋدىڭ قارىزى شامامەن 2،1 ميلليارد تەڭگەگە جەتتى، دەپ حابارلايدى almaty-akshamy.kz «الماتى جىلۋ جۇيەسى» جشس-نە سىلتەمە جاساپ.
ەندى كۇن سايىن «الماتى جىلۋ جۇيەسىنە» قارىز بىرنەشە ونداعان بورىشكەر ىستىق سۋدان قاعىلادى. ايتا كەتەتىن نارسە، ەكى جانە ودان دا كوپ اي بويى تولەنبەسە، تۇتىنۋشى بورىشكەر ساناتىنا ەنىپ، قارىزدى وتەۋ تۋرالى حابارلاما الادى. ەگەر بورىشكەر سوندا دا قارىزىن جاپپاسا، شارا قولدانىلىپ، پاتەرىندەگى نە ۇيىندەگى ىستىق سۋى وشىرىلەدى.
بورىشكەرلەرگە ىستىق سۋ بەرۋدى توقتاتۋ – بۇل امالسىز قولدانىلعان شارا. كاسىپورىن مۇنداي شاراعا بارۋعا ءماجبۇر، ويتكەنى تۇتىنۋشىلاردىڭ جىلۋدىڭ اقىسىن تولەمەۋى الداعى جىلىتۋ ماۋسىمىنا تولىق دايىندالۋعا، قىستان قىسىلماي شىعۋعا كەرى اسەرىن تيگىزەدى.
بيىل جىل باسىنان بەرى الماتىدا جىلۋدىڭ اقشاسىن تولەمەگەن 1610 ابونەنتتىڭ ۇيىندەگى ىستىق سۋى وشىرىلگەن. بۇگىنگە دەيىن كومپانياعا جىلۋ مەن ىستىق سۋ ءۇشىن تولەمەگەن 1212 تۇتىنۋشىنىڭ اكتيۆى، 355 بانكتىك ەسەپشوت بۇعاتتالدى، تولەمدى ۋاقىتىندا تولەمەگەن 165 ازاماتقا قازاقستاننان شىعۋعا تىيىم سالىندى.
سوتقا شاعىم ءتۇسىرۋ ارقىلى پايدالانىلعان جىلۋ ءۇشىن بەرەشەكتى ءوندىرىپ الۋدا بورىشكەردىڭ جىلجىمالى جانە جىلجىمايتىن مۇلكىن، كولىك قۇرالىن، بانكتىك شوتىن بۇعاتتاۋ، رەسپۋبليكادان تىس جەرگە شىعۋىنا شەكتەۋلەر ەنگىزۋ، قىزمەتتىڭ بارلىق ءتۇرى بويىنشا ليسەنزيالاردىڭ قولدانىلۋىن جانە مەملەكەتتىك ورگانداردان قۇجات راسىمدەۋدى توقتاتا تۇرۋ كوزدەلگەنىن ەستەرىڭىزگە سالامىز.
سونىمەن قاتار، قولدانىستاعى زاڭناماعا سايكەس، كوممۋنالدىق قىزمەت بويىنشا قارىزدىڭ بولۋى (بورىشكەرلەر تۋرالى اقپارات «مەملەكەتتىك كرەديتتىك بيۋرو» اق سۇراۋى بويىنشا بەرىلەدى) نەسيە بەرۋ كەزىندە دە ەسكەرىلەدى.
مۇنداي شارالار قارىزدى ادەيى تولەمەۋشىلەرگە قاتىستى عانا قولدانىلادى - ىستىق سۋدى وشىرۋدەن باستاپ سوت ارقىلى ءوندىرىپ الۋ شاراسىن قولدانىپ، كومپانيا وكىلدەرى ولارعا مىندەتتى تۇردە جيناقتالعان قارىزى تۋرالى حابارلاپ وتىرادى جانە باسقا دا ءبىرقاتار الدىن الۋ شاراسىن جۇرگىزىپ كەلەدى.
جىلۋ جۇيەسىنىڭ قىزمەتكەرلەرى قارىزدى ءوندىرۋ جۇمىستارى تۇراقتى تۇردە جۇرگىزىلىپ وتىرعانىن حابارلادى. سوندىقتان «الجج» ج ش س ازاماتتاردى قارىزىن تەز ارادا وتەۋگە جانە كوممۋنالدىق قىزمەت ءۇشىن تولەمدى ۋاقىتىلى تولەۋگە جاۋاپكەرشىلىكپەن قاراۋعا شاقىرادى.