الماتىدا بولعان اتىسقا قاتىستى قىلمىستىق ءىس قوزعالدى

سوت شەشىمىن ورىنداۋ كەزىندە 5 ادام قازا بولدى: قايتىس بولعانداردىڭ ەكەۋى ۋچاسكەلىك پوليسيا ينسپەكتورى مەن سوت ورىنداۋشىسى

اتالعان وقيعا بۇگىن كەشكە شامامەن 17.00 -دە بولدى. قايعىلى جاعداي ەكى ادامنىڭ مەنشىك قۇقىعىنا قاتىستى داۋى بويىنشا سوت شەشىمىن ورىنداۋ كەزىندە ورىن الدى، دەپ حابارلايدى Almaty-akshamy.kz.

قازاقپارات اگەنتتىگىنىڭ اقپاراتى بويىنشا، سوت شەشىمىمەن تانىسقان سوڭ، جەرگىلىكتى تۇرعىن ۇيگە جۇگىرىپ بارىپ، سوت ورىنداۋشىسىنا، ۋچاسكەلىك پوليسيا ينسپەكتورلارىنا جانە اۋلادا بولعان باسقا ادامدارعا قارۋدان وق جاۋدىردى. بەس ادام، ونىڭ ىشىندە قىزمەتتە بولعان ەكى پوليسيا قىزمەتكەرى، وقتان جاراقات الىپ، كوز جۇمدى.

«كۇدىكتى ارنايى جاساق ساربازدارىنىڭ قاتىسۋىمەن قارۋ قولدانىلماي ۇستالدى، ويتكەنى ۇيدە ايەلدەر مەن بالالار بولدى. اتالعان فاكت بويىنشا ق ر قىلمىستىق كودەكسىنىڭ 99-بابى 2-بولىگى («كىسى ءولتىرۋ») بويىنشا قىلمىستىق ءىس قوزعالدى. جاسالعان قىلمىس ءۇشىن 20 جىلعا دەيىن باس بوستاندىعىنان ايىرۋ نەمەسە ءومىر بويىنا باس بوستاندىعىنان ايىرۋ جازاسى قاراستىرىلعان»،- دەدى الماتى قالالىق پوليسيا دەپارتامەنتى باسشىسىنىڭ ورىنباسارى رۇستەم ءابدىراحمانوۆ.

قازىرگى ۋاقىتتا وقيعا ورنىندا جەدەل تەرگەۋ توبى جۇمىس ىستەپ جاتىر. اتىس شىققان جەردى پوليسيا قورشاۋعا الدى. ازاماتتاردىڭ ءومىرى مەن دەنساۋلىعىنا ءقاۋىپ جوق.

ەستەرىڭىزگە سالا كەتەيىك، بۇگىن كەشكە الماتىدا اتىس بولىپ، 5 ادامنىڭ قازا تاپقانىن حابارلاعان ەدىك.