الماتى قالاسىنىڭ يندۋستريالدى ايماعىندا اۆتوموبيل جانە ارنايى تەحنيكاعا ارنالعان لاك-بوياۋ ونىمدەرىن شىعاراتىن جاڭا زاۋىت قۇرىلىسى باستالدى. بۇل تۋرالى Aqshamnews.kz سايتى حابارلايدى.
11،1 ملرد تەڭگە كولەمىندە ينۆەستيسيا تارتىلعان جوبانىڭ ىسكە قوسىلۋى 2026 جىلدىڭ ءۇشىنشى توقسانىنا جوسپارلانعان. زاۋىتتىڭ قۋاتتىلىعى جىلىنا 6 091 توننانى قۇراپ، قازاقستانداعى لاك-بوياۋ ونىمدەرىنە دەگەن ىشكى سۇرانىستىڭ 11%-ىن وتەي الادى.
كاسىپورىندا اۆتوكولىكتەر، اۆتوبۋستار، جۇك كولىكتەرى، اۋىل شارۋاشىلىعى جانە قۇرىلىس تەحنيكالارىنا ارنالعان بوياۋلار، جول بەلگىلەرىنە ارنالعان ماتەريالدار، سونداي-اق جالپى وندىرىستىك جانە قورعانىش جابىندارى وندىرىلمەك.
جوبا اياسىندا 84 جاڭا جۇمىس ورنى اشىلىپ، لاك-بوياۋ تەحنولوگياسى مەن كولوريستيكا سالاسىندا 6 جاڭا ماماندىق ەنگىزىلەدى. وندىرىستىك پروسەستەر جۇڭگو جانە نيدەرلاندى سەرىكتەستەرىمەن بىرلەسىپ ىسكە اسىرىلماق.
توو باس ديرەكتورى تورەالى قۇرمانوۆتىڭ ايتۋىنشا، بۇل – ورتالىق ازياداعى العاشقى اۆتوموبيلگە ارنالعان لاك-بوياۋ زاۋىتى بولماق. جوبانىڭ 80%-ى بۇرىن قازاقستاندا وندىرىلمەگەن ونىمدەردەن تۇرادى. نارىققا العاش رەت Made in Kazakhstan تاڭباسىمەن بوياۋ شىعارىلادى. نەگىزگى تۇتىنۋشىلار رەتىندە اۆتوموبيل، مۇناي-گاز جانە تاۋ-كەن سالالارىنداعى كاسىپورىندار كوزدەلۋدە. Astana Motors-تىڭ ەكى زاۋىتىمەن وفتەيك-كەلىسىمشارت جاسالعان.
الماتى قالاسى اكىمىنىڭ ورىنباسارى الىشەر ءابدىقادىروۆ: «اۆتوموبيل ءوندىرىسى جىلىنا ورتا ەسەپپەن 20% ءوسىپ كەلەدى. سوڭعى بەس جىلدا بۇل سالا قالانىڭ ونەركاسىپ قۇرىلىمىنىڭ 30%-ىن قۇرادى. لاك-بوياۋ زاۋىتى جوعارى قوسىلعان قۇنى بار ءوندىرىستى دامىتىپ، ەكونوميكانىڭ ءارتاراپتانۋىنا سەرپىن بەرەدى»، – دەدى.
ايتا كەتەيىك، 2025 جىلى الماتى يندۋستريالدى ايماعىندا جالپى قۇنى 135،4 ملرد تەڭگەگە 11 جوبا ىسكە قوسىلادى.