قازاق ۇلتتىق قىزدار پەداگوگيكالىق ۋنيۆەرسيتەتىندە «Balancing Act: كوشباسشى، كاسىپكەر ايەل – قوعام بەينەسى» اتتى دوڭگەلەك ۇستەل اياسىندا ستۋدەنتتىك ەمحانا مەن بيزنەس حابتىڭ سالتاناتتى تۇردە اشىلۋ ءراسىمى ءوتتى.
ستۋدەنتتىك ەمحانانىڭ قىزىل لەنتاسىن قازاقستان رەسپۋبليكاسى پارلامەنتى ءماجىلىسىنىڭ الەۋمەتتىك-مادەني دامۋ كوميتەتىنىڭ حاتشىسى نۇرگۇل تاۋ، استانا قالاسىنداعى Line Brew مەيرامحانالار جەلىسى مەن The Veil قوناق ءۇيىنىڭ باس ديرەكتورى جاقۋپوۆا گۇلميرا جانە QyzPU-دىڭ باسقارما ءتوراعاسى – رەكتورى گۇلميرا ءامىرحان قىزى قاناي كەستى.
زاماناۋي تەحنيكامەن جابدىقتالعان بۇل ەمحانانىڭ باستى ماقساتى – ۇجىمنىڭ دەنساۋلىعىن نىعايتۋ جانە ستۋدەنتتەرگە ساپالى مەديسينالىق قىزمەت كورسەتۋ. جاڭا ورتالىق ستۋدەنتتەردىڭ وقۋ ۇدەرىسىنە بارىنشا قولايلى جاعداي جاساپ، اۋرۋشاڭدىقتىڭ الدىن الۋ جانە دەنساۋلىق كورسەتكىشتەرىن جاقسارتۋعا باعىتتالعان.
«ەلىمىزدىڭ تۇكپىر-تۇكپىرىنەن كەلىپ، ءبىلىم الىپ جاتقان قىزدارىمىزدىڭ دەنساۋلىعىن ساقتاۋ جانە نىعايتۋ ماقساتىندا ۋنيۆەرسيتەت قابىرعاسىندا ەمحانا اشتىق. بۇل – جاستارىمىزعا العاشقى مەديسينالىق كومەك كورسەتۋگە ارنالعان ارنايى ورتالىق. ەمحانادا ءتىس دارىگەرى، قىزداردىڭ رەپرودۋكتيۆتىك دەنساۋلىعىن نىعايتۋ ماقساتىندا اكۋشەر-گينەكولوگ، سونداي-اق جالپى تاجىريبەلىك دارىگەرلەر جۇمىس ىستەيدى. ءبىز قىزدارىمىزعا بارىنشا ىڭعايلى جاعداي جاساۋعا تىرىسىپ جاتىرمىز. مەديسينالىق كومەككە قاجەتتىلىك تۋىنداعان جاعدايدا، ولار ءبىزدىڭ ەمحانادان بارلىق قاجەتتى قىزمەتتى الا الادى»، – دەدى «Almaty Clinic» مەديسينالىق ورتالىعىنىڭ ديرەكتورى كۋساينوۆا دينا تۋرگۋنباي قىزى.
بيزنەس حابتىڭ قىزىل لەنتاسىن «اتامەكەن» ۇكپ شاعىن كاسىپكەرلىكتى جانە حالىقارالىق ىنتىماقتاستىقتى دامىتۋ جونىندەگى ديرەكتور ورىنباسارىنىڭ مىندەتىن اتقارۋشى تورەبەكوۆا جانار مەيرام قىزى، استانا قالاسىنداعى Line Brew مەيرامحانالار جەلىسى مەن The Veil قوناق ءۇيىنىڭ باس ديرەكتورى جاقۋپوۆا گۇلميرا كەستى. بيزنەس حاب ستۋدەنتتەر مەن جاس كاسىپكەرلەر ءۇشىن جاڭا تانىستىقتار ورناتۋعا، تىڭ يدەيالار مەن پايدالى كەزدەسۋلەر وتكىزۋگە ارنالعان الاڭ بولماق. بۇل باستاما قىزداردىڭ كوشباسشىلىق قاسيەتتەرىن دامىتۋعا ىقپال ەتىپ، كاسىپكەرلىك پەن ءبىلىم الەمىندە وزىندىك ورنى بار جاڭا بۋىننىڭ قالىپتاسۋىنا جول اشادى.
«بۇگىنگى كۇن ءبىزدىڭ ۋنيۆەرسيتەت ءۇشىن ەرەكشە. ۋنيۆەرسيتەتىمىزدە بيزنەس حاب اشىلدى. بۇل ستۋدەنتتەرىمىز ءۇشىن زور مۇمكىندىك، كاسىپكەرلىككە جول اشاتىن جاڭا قادام. مۇندا ءتۇرلى موتيۆاسيالىق كەزدەسۋلەر، شەبەرلىك ساباقتارى جانە كاسىپكەرلىككە باعىتتالعان كۋرستار ۇيىمداستىرىلادى. وسى باعىتتا ايانباي ەڭبەك ەتىپ، جاستاردىڭ قابىلەتىن دامىتۋعا بار كۇشىمىزدى سالامىز»، – دەدى قىزدار كوشباسشىلىعى مەن كاسىپكەرلىك ورتالىعىنىڭ ءبولىم باسشىسى بەكقالييەۆا گۇلزيرا ماقزۇم قىزى.
اشىلۋ راسىمىنەن كەيىن «Balancing Act: كوشباسشى، كاسىپكەر ايەل – قوعام بەينەسى» اتتى دوڭگەلەك ۇستەلدە تىڭ يدەيالار ۇسىنىلىپ، قاتىسۋشىلار ءوزارا پىكىر الماستى. كەزدەسۋ سوڭىندا ۋنيۆەرسيتەتتىڭ باسقارما ءتوراعاسى – رەكتورى گۇلميرا قاناي قىزدارعا قولداۋ مەن دەمەۋشىلىك كورسەتكەن سەرىكتەس ۇيىمدارعا جانە بارشا قاتىسۋشىلارعا العىسىن ءبىلدىرىپ: «سانالى ۇرپاق قالىپتاستىرۋ جولىنداعى بىرلەسە وتىرىپ جاساپ جاتقان ەڭبەگىمىز اقتالا بەرسىن»، – دەدى.