جالاقىنىڭ 80 پايىزىن جۇمىس بەرۋشى ەمەس اكىمدىك تولەيدى
الماتىدا بيىل مۇگەدەكتىگى بار 500-دەن اسا ازامات جۇمىسپەن قامتىلعان، دەپ حابارلايدى Almaty-akshamy.kz Almaty.tv-گە سىلتەمە جاساپ.
قالا اكىمدىگى مۇگەدەكتىگى بار جانداردى قوعامدىق جۇمىسقا ارالاستىرۋ ءۇشىن جۇمىس بەرۋشىلەرگە قازىنادان 80 پايىزدىق سۋبسيديا ءبولىپتى. بۇل كاسىپكەر ءۇشىن دە، ەرەكشە قاجەتتىلىگى بار ادامدار ءۇشىن دە ءتيىمدى.
امان ورالباي ۇلى ءقازىر اۋديوكىتاپتاردى مونتاجداپ، رەداكسيالاۋمەن اينالىسىپ ءجۇر. مۇگەدەكتىگى بار بالالار مەن ەرەسەكتەرگە تەلەفون، كومپيۋتەر قولدانۋدى ۇيرەتەدى، ياعني تيفلومامان. ءقازىر ەڭبەك ەتىپ جاتقان قوعامدىق بىرلەستىككە «جۇمىسپەن قامتۋ» ورتالىعى ارقىلى قاڭتاردا ورنالاسىپتى.
«قۇدايعا شۇكىر، ءقازىر جۇمىس تابىلعانى. ءوزىمىزدىڭ ماماندىعىمىز بويىنشا جۇمىس ىستەپ جاتىرمىز عوي. وسى جەر ۇنايدى، قوعامدىق ۇيىم. ۇجىممەن ارالاسىپ، ۋاقىتىمىز وتە كوڭىلدى ءوتىپ جاتىر. جۇمىس ىڭعايلى»، – دەدى تيفلوپەداگوگ امان ورالباي ۇلى.
كىشكەنتايىنان كوزى كورمەسە دە قوعامنىڭ دامۋىنا، ءوزى سياقتى ەرەكشە قاجەتتىلىگى بار ادامداردىڭ ءومىرىن جەڭىلدەتۋگە وسىلاي ۇلەسىن قوسىپ كەلەدى. سالادا 10 جىلعا جۋىق تارىجيبەسى بار. مۇندا ءوزى سياقتى جۇمىس ىستەيتىن 25 ادام بار. ونىڭ باسىم بولىگى مەملەكەت بولگەن سۋبسيديا ارقىلى جۇمىسپەن قامتىلعان.
«سۋبسيديانىڭ ارقاسىندا ءبىراز ادامدى جۇمىسقا الىپ وتىرمىز. ءبىزدىڭ ۇيىمنىڭ ماقساتى پايدا تابۋ ەمەس، كەرىسىنشە وسى مۇگەدەكتىگى بار جانداردى قوعامدىق جۇمىسقا تارتۋ، الەۋمەتپەن ارالاستىرۋ. سوندىقتان مۇنداي سۋبسيديا بىزگە جاقسى پايداسىن تيگىزىپ جاتىر»، – دەدى «جان» مۇگەدەكتەر قۇقىعىن قورعاۋ قوعامدىق بىرلەستىك ءتوراعاسىنىڭ ورىنباسارى يلياس فاتكۋلين.
كاسىپكەرلىكتى دامىتۋدىڭ ۇلتتىق جوباسى بويىنشا ەلىمىزدە جەرگىلىكتى بيۋدجەتتەن مۇگەدەكتىگى بار جانداردى جۇمىسپەن قامتۋ ءۇشىن 50 پايىز سۋبسيديا ءبولىنۋى مىندەتتەلەدى. ال الماتى اكىمدىگى قارجى كولەمىن 80 پايىزعا جەتكىزگەن. سونىڭ ەسەبىنەن بيىل 500-دەن اسا ازامات جۇمىسقا تۇرىپتى. ياعني جالاقىنىڭ 80 پايىزىن جۇمىس بەرۋشى ەمەس اكىمدىك تولەيدى.
«اكىمشىلىك تاراپىنان 2021 جىلدىڭ قاراشاسىندا مۇگەدەكتىگى بار ازاماتتاردى جۇمىسپەن قامتۋ ءۇشىن كۆوتا بەكىتىلگەن. 2-4 پايىز ارالىعىندا ءىرى جانە ورتا كاسىپورىندار مۇگەدەكتىگى بار ازاماتتاردى جۇمىسپەن قامتۋ قاجەت»، – دەدى جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى دانيار الكەباي ۇلى.
ال مىندەتتەمەلەردى ورىنداماعان جەكە نە مەملەكەتتىك ۇيىمدارعا ايىپپۇل نەمەسە اكىمشىلىك كودەكسكە سايكەس شارالار قولدانىلادى. بۇگىندە قالادا مۇگەدەكتىگى بار 55 مىڭ ادام بولسا، سونىڭ 19 مىڭى جۇمىسقا جارامدى. 19 مىڭ ادامنىڭ 25 پايىزى جۇمىسپەن قامتىلعان. ولار – الەۋمەتتىك قىزمەتكەر، جاتتىقتىرۋشى، زاڭگەر مەن ەكونوميست، ءمۇعالىم.