كۇزگى اسكەرگە شاقىرۋ ناۋقانى جۇرۋدە
الماتىدا كۇزگى اسكەرگە شاقىرۋ ناۋقانى 1 قىركۇيەكتە باستالىپ، 31 جەلتوقسانعا دەيىن جالعاسادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ول تۋرالى ونلاين بريفينگتە الماتى قالاسى قورعانىس ىستەرى جونىندەگى دەپارتامەنتىنىڭ باسشىسى امانتاي وسەربايەۆ ايتتى.
«18 جاستان 27 جاسقا دەيىنگى كەيىنگە قالدىرۋعا نەمەسە ودان بوساتۋعا قۇقىعى جوق ازاماتتار مەرزىمدى اسكەري قىزمەتكە شاقىرىلادى. ق ر پرەزيدەنتىنىڭ بۇيرىعى نەگىزىندە الماتى قالاسى اكىمىنىڭ قاۋلىسىمەن قالادا شاقىرۋ كوميسسياسى قۇرىلدى. كوميسسيا ءتوراعاسى بولىپ الماتى قالاسى اكىمىنىڭ ورىنباسارى سەرىك قۇسايىنوۆ تاعايىندالدى. سونىمەن قاتار، شاقىرۋ كوميسسياسىنىڭ قۇرامىنا قۇقىق قورعاۋ ورگاندارى مەن قوعامدىق بىرلەستىكتەردىڭ وكىلدەرى ەندى. بيىل الماتىدان 1500 جاس جىگىت اسكەرگە الىنادى»، - دەدى ا. وسەربايەۆ.
قورعانىس ىستەرى جونىندەگى دەپارتامەنت باسشىسىنىڭ ايتۋىنشا، قازىرگى ۋاقىتتا ۇلتتىق قاۋىپسىزدىك كوميتەتىنىڭ اسكەري بولىمدەرىن جاساقتاۋ اياقتالۋعا جاقىن، كەيىننەن ۇلتتىق ۇلان قارۋلى كۇشتەرى مەن مەملەكەتتىك كۇزەت قىزمەتىنىڭ اسكەري بولىمدەرى جاساقتالادى.