بۇل ومىرگە ءقاۋىپتى!
وسىنداي 5 وقيعا ولىممەن اياقتالدى، دەپ حابارلايدى Almaty-akshamy.kz.
شۇعىل تەجەگىشتى باسۋدىڭ سەبەبى - تەمىرجول كولىگىندەگى قاۋىپسىزدىك ەرەجەلەرىن بۇزعان جاياۋ جۇرگىنشىلەر مەن اۆتوموبيلشىلەردىڭ نەمقۇرايدىلىعى بولىپ تابىلادى. الماتى وڭىرلىك كوممۋنيكاسيالار قىزمەتىنىڭ الاڭىندا «قتج-جۇك تاسىمالى» ج ش س فيليالى-«جت الماتى بولىمشەسى» باس ينجەنەرىنىڭ مىندەتىن اتقارۋشى الەكساندر يگوشەننىڭ قاتىسۋىمەن بريفينگ ءوتتى.
سپيكەر اتاپ وتكەندەي، تەمىرجولدىڭ ءقاۋىپتى ايماق ەكەنىن ماماندار ۇنەمى ەسكە سالادى. سوندىقتان تەمىرجولدىڭ جانىندا بارىنشا مۇقيات بولعان ءجون.
«اعىمداعى جىلدىڭ 7 ايىندا تەمىرجولدىڭ الماتى فيليالىنىڭ شەكاراسىندا لوكوموتيۆ بريگادالارى شۇعىل تەجەگىشتى 110 قولداندى، ونىڭ ىشىندە 5 وقيعا ولىممەن اياقتالدى. تەجەۋ سانىنىڭ ازايعانىنا قاراماستان، ستاتيستيكا وتە جاعىمسىز»، - دەپ اتاپ ءوتتى ا.يگوشەن.
بۇگىندە تەمىرجولشىلار اپاتتاردىڭ (ادامداردىڭ پوەزد استىندا قالۋى) الدىن الۋ ءۇشىن بارلىق شارالاردى قابىلداۋدا: جەلىلىك پوليسيا بولىمىمەن بىرلەسىپ رەيدتەر جۇرگىزىلۋدە، تۇسىندىرمە اڭگىمەلەر، وقۋ ورىندارىندا كەزدەسۋلەر وتۋدە، پلاكاتتار ىلىنۋدە، جاياۋ جۇرگىنشىلەر كوپىرلەرىن سالۋ، ت.ب. ماسەلەلەر جەرگىلىكتى اتقارۋشى ورگاندارمەن بىرلەسىپ پىسىقتالادى.
مىسالى، بيىل ەكى مىڭنان استام ادامدى قامتىعان كەزدەسۋلەر، سونداي-اق الماتى-1 ستانسياسىندا شۇعىل تەجەۋگە بەيىم ۋچاسكەدە 10 رەيد وتكىزىلدى.
«تەمىرجولدىڭ جانىندا تۇراتىن ادامدار قوزعالىس قاۋىپسىزدىگىن ەستەن شىعارماعاندارى ءجون. ولار تەمىرجولداعى بەلگىلەنبەگەن ورىنداردا جولداردى كەسىپ وتپەۋى، تەمىرجول كولىگى وبەكتىلەرىندە ويىن-ساۋىقتار وتكىزبەگەنى ابزال. جولاۋشىلار پويىزدارىنىڭ جىلدامدىعى ساعاتىنا 140 كم-گە جەتەدى، ال جۇك پويىزدارى ساعاتىنا 110 كم جىلدامدىقپەن جۇرەدى، سالماعى 7000 توننادان اسادى. مۇنداي كورسەتكىشتەر كەزىندە لوكوموتيۆ بريگاداسى جولدا كەدەرگىنى بايقاسا، شۇعىل تەجەۋدى قولدانۋى ابدەن مۇمكىن. ال لوكوموتيۆتى وقىس توقتاتقان كەزدە، جولدىڭ بەيىنىنە، پوەزدىڭ سالماعىنا جانە قوزعالىس جىلدامدىعىنا بايلانىستى كەمىندە 500 مەتر، ال كەيدە ءبىر كيلومەتردەن ارتىق قاشىقتىق قاجەت بولادى. بۇل اۆتوكولىك ەمەس، وندا بىرنەشە مەتر قاشىقتىقتا توقتاۋعا نەمەسە ءبىر جاققا بۇرۋعا بولادى»، - دەدى قتج سپيكەرى.
الەكساندر يگوشەن پويىزداردى شۇعىل توقتاتۋ تەمىرجول كولىگىنىڭ جۇمىسىنا كەرى اسەر ەتەتىنىن ايتتى.
«ولاردىڭ قوزعالىس ىرعاعى ادامداردىڭ، مالدىڭ نەمەسە اۆتوكولىكتىڭ بولۋى سەبەبىنەن وقىس، جوسپارسىز توقتاعان كەزدە ۇزىلەدى. قوزعالىستا ىركىلىستەر ورىن الۋدا، بۇل ورىنسىز شىعىندارعا اكەلەدى، پويىزدار قوزعالىسىنىڭ قاۋىپسىزدىگى، ال اۆتوكولىكپەن سوقتىعىسقان كەزدە ۆاگوندار مەن لوكوموتيۆتەردىڭ بۇزىلادى»، - دەپ تولىقتىردى ا.يگوشەن.
تەمىرجولشىلارعا بالالاردىڭ تەمىرجولداردا ويناۋى جانە الەۋمەتتىك جەلىلەر ءۇشىن روليكتەر ءتۇسىرۋى ەرەكشە الاڭداۋشىلىق تۋعىزادى.
سپيكەردىڭ ايتۋىنشا، تەمىرجول كولىگى نىساندارىندا بەينەروليكتەر ءتۇسىرۋ، قۇلاققاپپەن مۋزىكا تىڭداۋ، اسىرەسە، كاپيۋشوندى كيىپ الۋ وتە ءقاۋىپتى. ويتكەنى مۇنداي جاعدايدا لوكوموتيۆ بەرەتىن سيگنالداردى ەستىمەي قالادى ءارى الدىن بايقامايدى.
سپيكەر الماتىلىقتار مەن قالا قوناقتارىن تەمىرجولداعى ءتارتىپ ەرەجەلەرىن مۇلتىكسىز ساقتاۋعا شاقىردى. مۇقيات جانە قىراعى بولۋ كەرەك! تەك سوندا عانا اپاتتىڭ الدىن الۋعا بولادى. كەز-كەلگەن ادام تەمىرجول كولىگى وبەكتىلەرىندە ارنايى بولىنگەن ورىنداردا: جابدىقتالعان جاياۋ جۇرگىنشىلەر وتپەلەرى، توننەلدەر، كوپىرلەر، تەمىرجول وتپەلەرى، جول وتپەلەرى ارقىلى كەسىپ وتۋگە ءتيىس. تەمىرجول رەلستەرىن ىڭعايلى جەردە نەمەسە ۋاقىتتى ۇنەمدەۋ ءۇشىن كەسىپ وتۋگە بولمايدى. بۇل ومىرگە ءقاۋىپتى!