جوندەۋ جۇمىستارىنا قالا بيۋدجەتىنەن 20 ملرد تەڭگە ءبولىندى
الماتىدا 2023 جىلعا ارنالعان جول جوندەۋ جۇمىستارىنىڭ جوسپارى بەكىتىلدى. ورتاشا جوندەۋ جۇمىستارى 200-دەن اسا كوشەگە جۇرگىزىلەدى. ولاردىڭ جالپى ۇزىندىعى 200 كم-دەن استام. جوندەۋ جۇمىستارىنا قالا بيۋدجەتىنەن 20 ملرد تەڭگە ءبولىندى. ورتاشا جوندەۋ كەزىندە جولدىڭ توزىعى جەتكەن جوعارعى قاباتىن قالپىنا كەلتىرۋ ءۇشىن كەشەندى جۇمىستار جۇرگىزىلەدى، دەپ حابارلايدى Almaty-akshamy.kz.
جۇمىستار قۇرىلىمدىق ساراپتاما ناتيجەسىن الىپ، ءتيىستى ساتىپ الۋلار اياقتالعاننان كەيىن ءساۋىر ايىندا باستالادى دەپ جوسپارلانعان. ماگيسترالدىق كوشەلەردەگى ورتاشا جوندەۋ جۇمىستارى 27 تامىزعا دەيىن، ال اۋداندىق ءمانى بار كوشەلەردەگى جۇمىستار 30 قازانعا دەيىن جۇرگىزىلەتىن بولادى. جۇمىستار باستالار الدىندا ناقتى كوشەلەر ءتىزىمى مەن جۇمىس ۋاقىتى الدىن الا جاريالانادى.
جول اقاۋلارىن شۇعىل تەگىستەۋدى كوزدەيتىن اعىمداعى جوندەۋ اياسىندا الماتىدا جول بويىنداعى شۇقىرلار مەن جارىقتار تەگىستەلىپ، ليۋكتەر كوتەرىلىپ، تاعى باسقا اعىمدىق جۇمىستار جۇرگىزىلەدى. وسى جۇمىستاردى ىسكە اپسىرۋ ءۇشىن قالا بيۋدجەتىنەن 2،8 ملرد تەڭگە ءبولىنىپ وتىر. جوسپارعا سايكەس 350 مىڭ م2 استام جول اعىمداعى جوندەۋدەن وتەدى، سونداي-اق 30 كم تروتۋار مەن 40 ايالداما كەشەنى جوندەلەدى. جىل سوڭىندا قاناعاتتانارلىق جانە ورتاشا دەڭگەيدەگى جول ۇلەسىن 89%-عا جەتكىزۋ جوسپارلانۋدا.
سونىمەن قاتار، جول قۇرىلىسى جوسپارىنا 6 شاعىن اۋداندا 30 كم جاڭا جول سالۋ ەنگىزىلگەن. جولدار ينجەنەرلىك كوممۋنيكاسيالاردىڭ ىسكە قوسىلۋىنا قاراي 2023-2024 جىلدارى قولدانىسقا بەرىلەتىن بولادى.
قالا تۇرعىندارى 1 ناۋرىز كۇنى باستالعان «حالىق قاتىساتىن بيۋدجەت» باعدارلاماسى بويىنشا تروتۋارلاردى سالۋ جانە جوندەۋگە ءوتىنىش بەرە الادى. وتىنىمدەر 30 ناۋرىزعا دەيىن قابىلدانادى.
ەسكە سالساق، المالى اۋدانى تۇرعىندارىمەن كەزدەسۋى كەزىندە الماتى اكىمى ەربولات دوسايەۆ «حالىق قاتىساتىن بيۋدجەت» باعدارلاماسىن جۇزەگە اسىرۋ ءۇشىن 2023 جىلى قوسىمشا 7 ملرد تەڭگە بولىنگەندىگىن حابارلاعان بولاتىن. بۇل شەشىم باعدارلامانىڭ تيىمدىلىگىن ەسكەرە وتىرىپ قابىلداندى. قوسىمشا قاراجات قالانىڭ 8 اۋدانى اراسىندا بولىنەتىن بولادى.
«حالىق قاتىساتىن بيۋدجەت» باعدارلاماسى بويىنشا قاجەتتى كەڭەستى الماتى قالاسىنىڭ اۋداندىق اكىمدىكتەرىندە، سونداي-اق الماتى اكىمدىگىنىڭ Open Almaty قوعامدىق قابىلداۋىندا 224 39 29 (ۆن. 203)، 1308 نومەرلەرى ارقىلى الۋعا بولادى.