الماتى قالاسىنىڭ «بيۋدجەتكە قاتىسۋ» جوباسى بويىنشا تۇرعىنداردان 36 ءوتىنىم كەلىپ ءتۇستى، دەپ حابارلايدى almaty-akshamy.kz
ەستەرىڭىزگە سالساق، الماتى قالاسىنىڭ بيۋدجەتىن ءبولۋ پروسەسىنە تۇرعىنداردىڭ قاتىسۋىن قاراستىراتىن «بيۋدجەتكە قاتىسۋ» جوباسى اياسىندا جوبالىق ۇسىنىستاردى قابىلداۋ 23 تامىزدان باستالعان بولاتىن. بيىلعى جىلدىڭ 23 تامىزى مەن 6 قىركۇيەگى ارالىعىندا قالا تۇرعىندارى 36 جوبا ۇسىندى.
«Open Almaty» الماتى قالاسى اكىمدىگىنىڭ قوعامدىق قابىلداۋ بولمەسىنىڭ باسپا ءسوز قىزمەتىنىڭ مالىمەتىنشە، ەڭ كوپ ءوتىنىم الاتاۋ اۋدانىنان اباتتاندىرۋ بويىنشا (23)، ودان كەيىن المالى جانە اۋەزوۆ اۋداندارى (4-تەن)، بوستاندىق اۋدانىنان (2) كەلىپ ءتۇستى. ءبىر وتىنىمنەن ناۋرىزباي، تۇركسىب جانە جەتىسۋ اۋداندارىنىڭ تۇرعىندارىنان تۇسكەن.
اتالمىش جوبانى جۇزەگە اسىرۋعا الماتى قالاسىنىڭ اكىمدىگى 6،4 ملرد تەڭگە، ياعني، ءار اۋدانعا 800 ملن تەڭگەدەن بولەدى.
ايتا كەتەيىك، قالا تۇرعىندارىنان وتىنىمدەر نەگىزىنەن كوپشىلىك سەرۋەندەيتىن جەرلەردە ورىندىق، قوقىس جاشىگى جانە بالالار الاڭىن ورناتۋ، ەرەسەك تۇرعىنداردىڭ دەمالۋىنا قاجەتتى جابدىقتار مەن كونسترۋكسيالار ورناتۋ جانە جوندەۋ» (27)، «ورتاق پايدالانۋ ورىندارىن قۇرۋ، جوندەۋ جانە جارىقتاندىرۋ (ساياباقتار، سكۆەرلەر، جاياۋ جۇرگىنشىلەر ايماقتارى جانە وزگە دە وبەكتىلەر)» (7)، «جيەكتاس، ورنەكتاس، قورشاۋدى جوندەۋ» (1) جانە «تروتۋارلاردى اباتتاندىرۋ»(1) ماسەلەلەرى بويىنشا تۇسكەن.
سونداي-اق، ۇسىنىستاردىڭ ىشىندە الماتى قالاسىنىڭ حالىقارالىق اۋەجايىندا ۆەلوجول سالۋ، اۋلا، بالالار مەن سپورت الاڭىن كۇردەلى جوندەۋ، ۇيلەردىڭ قاسبەتىن جوندەۋ جانە سىرلاۋ جانە ت.ب. بار.
تۇرعىنداردىڭ جوباعا قاتىسۋ جولدارى جايلى «Open Almaty» الماتى قالاسى اكىمدىگىنىڭ قوعامدىق قابىلداۋ بولمەسى «قالا تۇرعىندارى 1 قازانعا دەيىن قالالىق ورتانى دامىتۋ جونىندە ۇسىنىس يدەياسىن budget.open-almaty.kz پورتالىنا جىبەرۋ قاجەت. ەگەر بۇل باستاما باسقا تۇرعىنداردىڭ داۋىستارىمەن قولداۋ تاپسا، ول قالالىق بيۋدجەت ەسەبىنەن جۇزەگە اسىرىلادى» دەپ مالىمدەدى.