پوليسەيلەر جەدەل شارالار قابىلداپ جاتىر.
الماتى پوليسياسى جالعان ۆاكسيناسيا ءتولقۇجاتىن قانداي مەديسينالىق مەكەمەلەر جاساعانىن ايتتى، دەپ حابارلايدى Almaty-akshamy.kz.
ىشكى ىستەر مينيسترلىگىنىڭ رەسمي سايتىنداعى دەرەككە جۇگىنسەك، بۇل تۋرالى ءتارتىپ ساقشىلارى ZOOM بەينەپلاتفورماسى ارقىلى وتكەن مەديسينالىق مەكەمەلەردىڭ ارنايى جينالىسى كەزىندە حابارلاعان.
«تۇراقتى نەگىزدە ينتەرنەت-رەسۋرستارعا جانە بۇقارالىق اقپارات قۇرالدارىنا مونيتورينگ جۇرگىزىلۋدە، مەديسينالىق انىقتامالاردى قولدان جاساۋ فاكتىلەرىن انىقتاۋ بويىنشا جەدەل شارالار قابىلدانۋدا. ەسكە سالايىق، جاقىندا ازاماتتاردى ساۋد اراۆيا كورولدىگىنە جىبەرۋ ءۇشىن 140-تان استام جالعان ۆاكسينا ءتولقۇجاتىن جاساۋمەن اينالىسقان تۋريستىك كومپانيا انىقتالدى. سونىمەن قاتار، تەرگەۋ ساتىسىندا №21، №4، №16 جانە №13 قالالىق ەمحانالاردىڭ جالپى تاجىريبەلىك دارىگەرلەرىنە قاتىستى قىلمىستىق ىستەر قارالۋدا. ولار كىرگەن ازاماتتارعا ۆاكسيناسيانى سالماي-اق، دوزانىڭ ءبىرىنشى كومپونەنتىن قابىلداۋ تۋرالى جالعان دەرەكتەردى بازاعا ەنگىزگەن نەمەسە ۆاكسينا بولمەسىندە بەينەباقىلاۋ كامەراسى بولسا، ولار ەكپەنى العانداي ەتىپ كورسەتىپ ەكپە سالىنعان ورىندى پلاستىرمەن جابىستىرعان. بۇل قىزمەتتەردىڭ بارلىعى اقشالاي سىياقى ءۇشىن ۇسىنىلعاندىعى انىق»، – دەدى ءوز سوزىندە الماتى قالالىق پوليسيا دەپارتامەنتى باستىعىنىڭ ءبىرىنشى ورىنباسارى نۇرلان الماسبەكوۆ.
سونىمەن قاتار، سپيكەر جالعان قۇجات جاساعانى ءۇشىن قىلمىستىق جاۋاپكەرشىلىك 4 جىلعا دەيىن باس بوستاندىعىنان ايىرۋ تۇرىندە ەكەندىگىن، ال ونى قولدانعانى ءۇشىن 40 تاۋلىككە قاماۋعا الۋ تۇرىندە قاراستىرىلعانىن ەسكە ءتۇسىردى. سونداي-اق، جوعارىدا اتالعان ازاماتتاردىڭ ارەكەتتەرىندە «قىزمەتتىك جالعاندىق» بەلگىلەرى بار، ياعني، جالعان اقپاراتتى رەسمي قۇجاتتارعا ەنگىزۋ.
«قۇرمەتتى مەديسينا قىزمەتكەرلەرى، ءوزىڭىزدى قىلمىستىق ىسكە تارتۋعا جول بەرمەڭىز جانە وتباسىڭىز بەن دوستارىڭىزدى وسىدان قورعاڭىز»، – دەپ قورىتىندىلادى الماسبەكوۆ.
