ءابىلحان قاستەيەۆ اتىنداعى ق ر مەملەكەتتىك ونەر مۋزەيىنىڭ ورتالىق كورمە زالىندا سۋرەتشىلەر وداعىنىڭ مۇشەسى، «الماتى وبلىسىنىڭ ۇزدىك سۋرەتشىسى» نوميناسياسىنىڭ يەگەرى مارات توتەيەۆتىڭ «ءبىر ءساتتىڭ ماڭگىلىك بەينەسى» اتتى جەكە شىعارماشىلىق كورمەسى اشىلدى. ەكسپوزيسيادا سۋرەتشىنىڭ تابيعات جانە پورترەتتىك جانرداعى 150-گە جۋىق تۋىندىسى ۇسىنىلدى.
ەلىمىزدىڭ ءاربىر ولكەسىن شىنايى سۋرەتتەگەن سۋرەتشى تۋىندىلارىندا ۋاقىت پەن بولمىستىڭ اسەرلى قۇبىلىستارىن ەرەكشە ديناميكالىق ىرعاقتا بەينەلەيدى. قىلقالام شەبەرىنىڭ پاليتراسى كۇردەلi بولعانمەن، كورەرمەن ءۇشىن سيۋجەتتىك كومپوزيسيانى جەڭىل قابىلداۋىنا مۇمكىندىك بەرەدى. ايتالىق «اقجار»، «تۋعان جەر بەرىكتاس»، «جاركەنت. ىلە وزەنى»، «سۋىق ساي»، «تەكەلى تاۋى»، «كەلەس وزەنى»، «كامەنكا پلاتو» اتتى تۋىندىلارى قورشاعان الەمنىڭ ەرەكشە سۇلۋلىعىن قانىق جانە كونتراست تۇستەردىڭ ۇندەستىگىن ءوزارا ۇيلەستىرە وتىرىپ، تابيعاتتىڭ قاسقاعىم ءساتىن ماڭگىلىككە اينالدىرادى.
پەيزاج جانرىندا ول كورگەنىن جازىپ قانا قويماي، ءاربىر ولكەنىڭ تابيعاتىن زەرتتەپ، جەتە بەينەلەۋىندە كورەرمەننىڭ اسەرلى سەزىمدە سول اتموسفەرانى قابىلداۋىن جانە ەستە ساقتاۋىن كوزدەيدى. سۋرەتشى-پەيزاجيست كۇندەلىكتى قوزعالىستاعى قۇبىلىستىڭ ءبىر ساتكە ۋاقىتتى توقتاتىپ، سول ساتتەگى شەكسىز كەڭىستىكتىڭ ماڭگىلىك قۇندىلىعىن سەزىنۋگە مۇمكىندىك بەرەدى. سوندىقتان دا تابيعاتتىڭ تىلسىم قۇبىلىسىن كورۋ، سەزىنۋ جانە اسەرلى جەتكىزۋ – سۋرەتشى ءۇشىن ماڭىزدى ءسات.
– مارات توتەيەۆ پورترەتتىك جانردا دا ءوزىنىڭ ەرەكشىلىگىن تانىتادى. ول رەڭكتەر، تەكستۋرا، جارىق ارقىلى ادام كەلبەتىنىڭ ناقتىلىعىنا عانا ەمەس، بەينەنىڭ ىشكى الەمىن، سەزىمىن كورسەتۋگە ەرەكشە ءمان بەرەدى. شىعارماشىلىعىندا پورترەتتىك جۇمىستارى تاريح بەتىن قايتا پاراقتاۋعا ۇندەيتىن تۋىندىلارى ورىن الادى. كورمەدە قوعامداعى ورنى بار، ءبىراق تاريحتا ەسىمى اتالماي قالعان ۇلى تۇلعالاردىڭ ءبىرى – ەتنوگراف، تاريحشى، اسكەري قىزمەت اتقارعان عازى بولات ۇلى ءۋاليحاننىڭ، شوقان ءۋاليحانوۆتىڭ جۇبايى ايسارا كوشەن قىزىنىڭ پورترەتى قويىلعان. سۋرەتشى تاريحي تۇلعالاردىڭ بەينەسىن سۋرەتتەي كەلە، سول ۋاقىت بەلەسىنىڭ اقيقاتىن كورسەتكىسى كەلەدى، – دەيدى قاستەيەۆ مۋزەيىنىڭ ءبولىم جەتەكشىسى گۇلنار جۇبانيازوۆا.
سۋرەتشى مارات مۇحامەدقالي ۇلى – ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ «مونۋمەنتتالدىق كەسكىندەمە» ماماندىعىن تامامداعان. شىعارماشىلىعىق جولىندا «پاراسات» رەداكسياسىندا ديزاينەرى «بۋيك» فرانسۋز كومپانياسىندا سۋرەتشى-بەزەندىرۋشى، مۋزەەفيكاسيا، جامبىل اۋدانى ۇزىناعاش اۋىلىنداعى ونەر مەكتەبىندە ۇستازدىق قىزمەتتەرىن اتقاردى. 2011 جىلدان باستاپ حالىقارالىق، رەسپۋبليكالىق جانە جەرگىلىكتى شىعارماشىلىق كورمەلەرگە، سيمپوزيۋمدارعا قاتىسىپ، وزىندىك ەرەكشە شىعارماشىلىق تۋىندىلارىمەن كوپتەگەن العىس حاتپەن، «بالالىق شاق دوسى»، «ونەر، مادەنيەت جانە سپورت ينستيتۋتىنا – 50 جىل»، «قۇرمەتتى ۇستاز» مەدالدارىمەن ماراپاتتالعان. سۋرەتشىنىڭ تۋىندىلارى قازاقستان، قىرعىزستان، تۇركيا، گەرمانيا، كاليفورنيا، ءۇندى كوللەكسيانەرلەرىنىڭ قورىندا ساقتالعان.
مارات توتەيەۆ كورمەسى قاڭتاردىڭ 25-ىنە دەيىن تۇرادى.