بۇل باعاعا جاسىل جەلەكتى ساتىپ الۋ، وتىرعىزۋ جانە ساپالى كۇتىمدى قامتاماسىز ەتۋ، 3 جىل بويى سۋارۋ كىرەدى
قالالىق ەكولوگيا جانە قورشاعان ورتا باسقارماسىنىڭ باسشىسى سەرىك ادىلبايەۆ الماتىنىڭ كوگالداندىرۋىنا قاتىستى ساپالى وزگەرىستەردى ايتىپ بەردى، دەپ حابارلايدى Almaty-akshamy.kz
«جاسىل جەلەكتەردى قورعاۋدىڭ بۇرىنعى ەرەجەسىنە سايكەس، 2021-2022 جىلدارى ءبىر جاسىل جەلەككە 500-دەن 6000 تەڭگەگە دەيىن قاراجات ءبولىندى. بۇل سوماعا ەكى جىل ىشىندە جاسىل جەلەكتى ساتىپ الۋ، وتىرعىزۋ جانە كۇتۋ كىردى. وسى سوماعا ساتىپ الىنعان جاسىل جەلەكتەر تامىرلانىپ ءوسىپ كەتپەدى، 30%-ى قۋراپ قالدى. وسىعان بايلانىستى قالا اكىمى ەربولات دوسايەۆتىڭ تاپسىرماسىمەن ءبىر جاسىل جەلەككە ارنالعان بيۋدجەت 16 مىڭ تەڭگەگە دەيىن كوبەيدى. بۇل باعاعا جاسىل جەلەكتى ساتىپ الۋ، وتىرعىزۋ جانە ساپالى كۇتىمدى قامتاماسىز ەتۋ، 3 جىل بويى سۋارۋ كىرەدى»، - دەدى سەرىك ادىلبايەۆ.
جاڭا ەرەجەدە كوشەتتەردىڭ ساپاسى، بيىكتىگى كەمىندە 2،5-3 مەتر بولۋى كەرەك، سونىمەن قاتار، ەگىلگەن اعاشتاردى جاقسىلاپ سۋارۋ سىندى تالاپتار كۇشەيدى. بۇرىن مۇنداي تالاپتار بولعان ەمەس.
2022-2023 جج. كۇزگى-كوكتەمگى ماۋسىمدا ساياباقتاردا، سكۆەرلەردە جانە الماتى كوشەلەرىنىڭ بويىندا 973 مىڭ كوشەت وتىرعىزىلدى، ولاردىڭ 50%-ى 29 ۇڭعىمانى جانە جەر استىنداعى سۋ بۇرۋ جۇيەسىن سالۋ ەسەبىنەن سۋارۋمەن قامتاماسىز ەتىلدى. وسىمدىكتەردى سۋارۋ ءۇشىن قازىرگى كەزدە ارىقتار ارقىلى وزەن اعىنىن باعىتتايتىن ەسكى سۋ جيناعىش قالپىنا كەلتىرىلىپ جاتىر.
ءداستۇرلى تۇردە كوشەتتەر الماتى وبلىسىنىڭ ءتالىمباقتارىنان ساتىپ الىندى. بۇرىنعى ءتالىمباقتار قالا قاجەتتىلىگىنىڭ 60%-ىن عانا قامتاماسىز ەتەتىنىن ەسكەرىپ، بيىل كوشەتتەر كليماتتىق جاعدايى الماتى قالاسىنا ۇقساس تۇركىستان وبلىسىنىڭ ءتالىمباقتارىنان ساتىپ الىنادى. بولاشاقتا الماتى وبلىسىنىڭ ءتالىمباقتارىنان كوشەت تاپشىلىعى جوسپارلى جۇمىس ەسەبىنەن شەشىلەدى، بۇل ءتالىمباقتاردىڭ جۇكتەمەسى مەن وندىرىستىك قۋاتىن ارتتىرۋعا، سونىمەن قاتار، اۋىلداعى جۇمىسسىزدىق ماسەلەسىن شەشۋگە مۇمكىندىك بەرەدى.
ەستەرىڭىزگە سالا كەتەيىك، 20 قىركۇيەكتەن باستاپ الماتىدا كۇزگى اعاش وتىرعىزۋ باستالادى. قالادا 298 مىڭ كوشەت ەگىلەدى. كۇزگى وتىرعىزۋ قالانىڭ بارلىق اۋدانىن قامتيدى. اتاپ ايتساق، مەدەۋ اۋدانىندا 22 مىڭ، جەتىسۋ اۋدانىندا 16 مىڭ، تۇركسىب اۋدانىندا 28 مىڭ، ناۋرىزباي اۋدانىندا 10 مىڭ، المالى، اۋەزوۆ جانە بوستاندىق اۋداندارىندا 5 مىڭ، الاتاۋ اۋدانىندا 207 مىڭ اعاش.