الماتىدا بەس جولدىڭ قاشان ۇزاراتىنى تۋرالى ايتتى

الماتىدا مەملەكەت باسشىسىنىڭ تاپسىرماسىن ورىنداۋ اياسىندا ءۇاااج بەس راديالدى جولدى ۇزارتۋ جۇمىستارى جۇرگىزىلۋدە.

قالالىق موبيلدىلىك  باسقارماسى باسشىسىنىڭ ورىنباسارى ەرنۇر ءابجاحان اتاپ وتكەندەي، جالپى ۇزىندىعى 3،2 كم ساين كوشەسىن ۇزارتۋ جۇمىستارى 65% - عا اياقتالدى، دەپ حابارلايدى Almaty-akshamy.kz. 

"وسى جوبا بويىنشا 66 جەر ۋچاسكەسىن الۋ قاراستىرىلۋدا، ونىڭ 65ء-ى بۇگىنگى كۇنى ساتىپ الىندى.جۇمىس بىرتىندەپ  جۇرگىزىلۋدە. جۇمىستاردى جۇرگىزۋ كەستەسى بويىنشا رىسقۇلوۆ داڭعىلىنان موكە بي كوشەسىنە دەيىن ساين كوشەسىن ۇزارتۋدى اياقتاۋ جانە پايدالانۋعا بەرۋ 2024 جىلدىڭ قىركۇيەگىنە جوسپارلانعان"، - دەدى ول الماتى قالاسى ءماسليحاتىنىڭ وتىرىسىندا.

سونداي – اق، رىسقۇلوۆ داڭعىلىن-وڭعارسىنوۆا كوشەسىنەن قالا شەكاراسىنا دەيىن ۇزارتۋ جوسپارلانۋدا. ونىڭ جالپى ۇزىندىعى 2،3 كم. ەرنۇر ءابجاحاننىڭ ايتۋىنشا، بۇل جوبا بويىنشا جۇمىستار ەندى عانا باستالدى. 

"جوبادا 274 جەر ۋچاسكەسىن الۋ كوزدەلگەن. بۇگىنگى تاڭدا 56 ۋچاسكە بويىنشا قاۋلىلار قابىلداندى. بۇل باعىتتا جەر قاتىناستارى باسقارماسىنىڭ جۇمىسى جالعاسۋدا. نىساندى اياقتاۋ جانە ىسكە قوسۋ 2025 جىلعا جوسپارلانعان"، - دەپ اتاپ ءوتتى قمب باسشىسىنىڭ ورىنباسارى. 

اباي كوشەسىن مومىش ۇلى كوشەسىنەن قالا شەكاراسىنا دەيىن ۇزارتۋعا كەلەتىن بولساق، جوسپارلانعان جۇمىستاردىڭ 5،3 كم-گە، 4،7 كم-گە جول جۇمىستارى جۇرگىزىلدى، ونىڭ ءبىر بولىگى پايدالانۋعا بەرىلدى. ۇزىندىعى 600 م بولاتىن سوڭعى بەرۋ كەشەنى قالادى. 

"بۇل جوبا جسق تۇزەتۋ ساتىسىندا تۇر، ءقازىر مەملەكەتتىك ساراپتامادان وتۋدەمىز. 2024 جىلدىڭ ءبىرىنشى توقسانىندا مەملەكەتتىك ساراپتامانىڭ قورىتىندىسىن الۋدى جوسپارلاپ وتىرمىز، ودان كەيىن قۇرىلىس-مونتاج جۇمىستارى باستاپ،2024 جىلدىڭ سوڭىنا دەيىن پايدالانۋعا بەرۋ جوسپارلانۋدا"، - دەپ ءتۇسىندىردى ەرنۇر ءابجاحان. 

ول تىلەندييەۆ كوشەلەرى مەن  سولتۇستىك اينالما جولدىڭ بويىندا قازىرگى ۋاقىتتا جسق ازىرلەنىپ جاتقانىن، ونىڭ اياقتالۋى 2024 جىلدىڭ سوڭىنا جوسپارلانعانىن ايتتى.

"الماتى قالاسىن دامىتۋدىڭ 2025 جىلعا دەيىنگى باعدارلاماسى جانە 2030 جىلعا دەيىنگى ورتا مەرزىمدى پەرسپەكتيۆالار" بويىنشا بارلىق جۇمىستاردى 2027 جىلعا دەيىن اياقتاۋ جوسپارلانۋدا.