2 مامىر كۇنى ق ر ساۋدا جانە ينتەگراسيا ءمينيسترى ارمان شاققالييەۆ جۇمىس ساپارىمەن الماتى قالاسىنا بارىپ، بازارلاردى جاڭعىرتۋ ماسەلەلەرى بويىنشا بيزنەس وكىلدەرىمەن كەزدەسۋ وتكىزدى، دەپ حابارلايدى aqshamnews.kz
كەزدەسۋ بارىسىندا بازارلاردى جاڭعىرتۋ كەزىندە تۋىندايتىن ماسەلەلەر تالقىلاندى. تاراپتار بازارلاردى جاڭعىرتۋ بارىسىندا تۋىندايتىن كەدەلگىلەر مەن ولاردى جۇيەلى شەشۋ جولدارىنا باسا نازار اۋداردى.
مينيستر الماتى قالاسى ىشكى ساۋداداعى نەگىزگى ورتالىق ەكەنىن ەرەكشە اتاپ ءوتتى. 2025 جىلدىڭ قاڭتار-ناۋرىز ايلارىنىڭ قورىتىندىسى بويىنشا الماتىداعى ىشكى ساۋدا اينالىمىنىڭ كولەمى 5 149،4 ملرد تەڭگەنى قۇرادى. ناقتى كولەم يندەكسى جوسپارلى كورسەتكىشتەن (102،9%) اسىپ، 103،1 پايىزعا جەتتى. الماتىداعى ساۋدا اينالىمى رەسپۋبليكالىق ساۋدانىڭ 36،2 پايىزىن الىپ وتىر. بۇل وڭىرلەر اراسىنداعى ەڭ جوعارى كورسەتكىش. اتالعان كەزەڭدە بولشەك ساۋدا كولەمى 1 447،7 ملرد تەڭگەنى (نكي — 106،8%)، كوتەرمە ساۋدا — 3 678 ملرد تەڭگەنى (نكي — 101،7%) قۇرادى.
بۇل كورسەتكىشتەر تۇراقتى، زاماناۋي ساۋدا ينفراقۇرىلىمىن ودان ءارى جەتىلدىرۋ قاجەتتىلىگىن راستايدى. سيفرلىق شەشىمدەر مەن ساۋدانىڭ زاماناۋي فورماتتارىن بەلسەندى ەنگىزۋ – كەلتىرىلگەن ستاتيستيكانى ودان ءارى دامىتۋعا مۇمكىندىك بەرەدى. ال بازارلاردى جاڭعىرتۋ – وسى سالاداعى باسىم باعىتتاردىڭ ءبىرى بولىپ قالا بەرەدى.
سوڭعى 10 جىلدا ەلدە بازارلاردى جاڭعىرتۋ بويىنشا اۋقىمدى جۇمىس ءجۇردى. ءقازىر الماتى قالاسىندا 59 بازار جۇمىس ىستەپ تۇر. ونىڭ 70% - ى جاڭعىرتىلعان. وتكەن جىلى الماتىدا التى بازاردا مودەرنيزاسيا جۇمىستارى اياقتالدى. بەكىتىلگەن كەستەگە سايكەس، بيىلعى جىلدىڭ سوڭىنا دەيىن تاعى ون نىساندا جاڭعىرتۋ جۇمىستارىن اياقتاۋ جوسپارلانعان. قازىرگى ۋاقىتتا ولاردىڭ تورتەۋىندە بەلسەندى قۇرىلىس ءجۇرىپ جاتىر.
سونىمەن بىرگە، التى نارىق بويىنشا بەكىتىلگەن مەرزىمدى ساقتاماۋ ءقاۋپى بار. وعان جەر ۋچاسكەلەرىن پايدالانۋعا شەكتەۋلەر، تەحنيكالىق شارتتار، اكىمشىلىك كەدەرگىلەر جانە قارجى رەسۋرستارىنىڭ تاپشىلىعى سەبەپ بولىپ وتىر. وسىعان بايلانىستى مينيستر جاۋاپتى مەملەكەتتىك ورگاندار مەن بيزنەس سۋبەكتىلەرى اراسىنداعى ۇيلەستىرۋدى كۇشەيتۋدى، سونداي-اق جوبالاردىڭ ىسكە اسىرىلۋ بارىسىنا جۇيەلى مونيتورينگ جۇرگىزۋدى تاپسىردى.
"بازارلاردى تاۋەلسىزدىك العان ساتتەن باستاپ ەلىمىزدە قولدانىلاتىن نورماتيۆتىك تەحنيكالىق اكتىلەردىڭ — قۇرىلىس، ورتكە قارسى، سانيتارلىق-ەپيدەميولوگيالىق تالاپتارىنا سايكەستەندىرۋىمىز كەرەك"، - دەدى ق ر ساۋدا جانە ينتەگراسيا ءمينيسترى.
ارمان شاققالييەۆ الماتى قالاسى ەلىمىزدىڭ ەڭ ءىرى قارجى جانە ساۋدا ورتالىعى عانا ەمەس، سونىمەن قاتار وزىق شەشىمدەردى ەنگىزۋ الاڭى ەكەنىن اتاپ ءوتتى. 2024 جىلدىڭ 1 قاراشاسىنان باستاپ حالىق بانكىمەن بىرلەسىپ "Digital Bazar" پيلوتتىق جوباسى ىسكە اسىرىلۋدا. قازىرگى ۋاقىتتا جوباعا الماتى قالاسى مەن الماتى وبلىسىنىڭ 7 بازارى تارتىلعان، سەرۆيسكە 4 276 كليەنت قوسىلعان. جوبانى ىسكە اسىرۋ، ەلەكتروندىق ساۋدا پلاتفورمالارىن دامىتۋ، قولما-قول اقشاسىز ەسەپ ايىرىسۋلاردى ەنگىزۋ جانە قارجى-تەحنولوگيالىق شەشىمدەرمەن ينتەگراسيالاۋ مەگاپوليستىڭ ساۋدا سالاسىن سيفرلاندىرۋدىڭ جوعارى دەڭگەيىن كورسەتەدى.
"2026 جىلدان باستاپ جاڭعىرتۋدان وتپەگەن بازارلار جۇمىسىن جالعاستىرا المايدى. بۇل قازىرگى ۋاقىت تالابى. قاۋىپسىزدىك، اشىقتىق جانە ىڭعايلىلىق ساۋدا ستاندارتىنا اينالۋى ءتيىس"، - دەپ تولىقتىردى مينيستر