بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا باتىس قازاقستان وبلىستىق كامەرالىق وركەسترىنىڭ ديرەكتورى سالتانات ابىلعازييەۆا مەن باسقا دا ارتىستەر ايتتى.
وركەستر ۇجىمى 6 قازاندا قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترىنىڭ كونسەرت زالىندا ونەر كورسەتەدى.
«6 قازاندا قۇرمانعازى وركەسترىنىڭ ساحناسىندا «الاتاۋعا اقجايىقتان سالەم» اتتى كونسەرتىمىز وتەدى. ءبىزدىڭ وركەستر ايگىلى مۋزىكانت، سكريپكاشى مارات بيسەنعالييەۆتىڭ باستاماسىمەن قۇرىلدى جانە 2011 جىلعا دەيىن «مارات بيسەنعالييەۆتىڭ فيلارمونيالىق وركەسترى» دەپ اتالدى. ءبىزدىڭ وركەستر 10 جىل ىشىندە ايتارلىقتاي جەتىستىكتەرگە جەتتى. ساحنادا ءبىزدىڭ جەرلەس ارتىستەر دە ونەر كورسەتەدى، ولار: ق ر ەڭبەك سىڭىرگەن قايراتكەرى دينا حامزينا جانە حالىقارالىق بايقاۋلاردىڭ لاۋرەاتى فارحات كوبەيەۆ جانە باسقالار»، - دەپ اتاپ ءوتتى س.ابىلعازييەۆا.
وركەستردىڭ رەپەرتۋارى نەگىزىنەن باروككو كەزەڭىنىڭ كلاسسيكالىق شىعارمالارىنان تۇرادى. دەگەنمەن، وركەستر ۇجىمى ءارتۇرلى جانرلارمەن تاجىريبە جاساپ ءجۇر: كونسەرتتە كورەرمەندەر ءداستۇرلى فولكلورلىق مۋزىكانى دا، زاماناۋي كومپوزيسيالاردى دا تىڭداي الادى.
«ءبىزدىڭ وركەستردىڭ قۇرىلعانىنا 10 جىلدان استى جانە وسى ۋاقىت ىشىندە ءبىز ءوز تىڭداۋشىلارىمىز بەن جانكۇيەرلەرىمىزدى جينادىق. ۇجىم ورال قالاسىنىڭ ارتىستەرىنەن، مۋزىكانتتاردىڭ كوپشىلىگى جەرگىلىكتى مۋزىكا كوللەدجىنىڭ تۇلەكتەرىنەن تۇرادى. رەپەرتۋارعا كەلەتىن بولساق، ءبىزدىڭ وركەستر نەگىزىنەن كلاسسيكالىق، اكادەميالىق مۋزىكانى ناسيحاتتايدى. سونىمەن قاتار، ءبىز كوللابوراسيا جاسايمىز، ءتۇرلى اسپاپتار - ۇلتتىق، زاماناۋي ەسترادالىق اسپاپتاردى قوسامىز، وسىلايشا كامەرالىق وركەسترىمىز جاڭاشا سيپاتقا يە بولادى»، - دەدى باتىس قازاقستان وبلىستىق كامەرالىق وركەسترىنىڭ كوركەمدىك جەتەكشىسى اسحات حاسانوۆ.
باتىس قازاقستان وبلىستىق كامەرالىق وركەسترىنىڭ ۇجىمىندا 25 ادام بار.
«ءبىز كامەرالىق قۇراممەن كەلدىك. ءبىزدىڭ قۇرامدا گيتارا، باس-گيتارا، ۇرمالى اسپاپتار، ۇرمەلى توپ، اعاش اسپاپتار دا بار. ءبىزدىڭ كونسەرتتە بارلىعىن اسىعا كۇتەمىز»، - دەپ ءبولىستى كامەرالىق وركەستر ءارتىسى ەلەنا شۋتاريەۆا.
وركەستر مۇنداي گاسترولدىك تۋرلار جاڭا سەرپىن مەن تىنىس بەرەتىنىن، سونداي-اق مۋزىكانتتاردىڭ كاسىبيلىگىن ارتتىراتىنىن اتاپ ءوتتى. وركەستر حالىقارالىق ساحنالاردا ونەر كورسەتۋ جانە قازاقستاندىق مۋزىكانى شەتەلدىك اۋديتورياعا تانىستىرۋدى جوسپارلاپ وتىر.
ايتا كەتۋ كەرەك، وركەستردىڭ گاسترولدىك تۋرى استانادا 10 قازاندا جالعاسادى.