سالتاناتتى ءىس-شاراعا الماتى قالاسى مادەنيەت باسقارماسىنىڭ باسشىسى عاني مايلىبايەۆ قاتىستى. شام جاعۋ راسىمىنە قاتىسۋشىلارعا قازاقستاندىق ەسترادا جۇلدىزدارى – روزا رىمبايەۆا، ءمادينا ءسادۋاقاسوۆا، ءالي وقاپوۆ، ءمادي رىمبايەۆ، «جىگىتتەر»، «كەشيۋ»، «رينگو»، «شاميس» توپتارى ونەر كورسەتتى.
سونداي-اق، قالانىڭ قوعامدىق كەڭىستىگى، جاياۋ جۇرگىنشىلەر كوشەلەرى: پانفيلوۆ، جىبەك جولى، ماگيسترالدىق كوشەلەر: ءساتبايەۆ كوشەسى، تولە بي كوشەسى، مايلين كوشەسى، نازاربايەۆ داڭعىلى، ءال-فارابي داڭعىلى، ابىلاي حان داڭعىلى جانە ت.ب. جارىق كومپوزيسيالارىنىڭ ءبىرىڭعاي ستيلىندە بەزەندىرىلدى.
ەسكە سالا كەتەيىك، جاڭا جىل قارساڭىندا – 31 جەلتوقساندا «استانا» الاڭىندا قازاقستاندىق ەسترادا جۇلدىزدارىنىڭ قاتىسۋىمەن كونسەرت وتكىزۋ جوسپارلانعان.
كونسەرت سوڭى مەرەكەلىك وتشاشۋعا ۇلاسادى. بۇدان باسقا، مەگاپوليستىڭ تۇرعىندارى مەن قوناقتارى ءۇشىن قالانىڭ بارلىق اۋداندارىن قامتيتىن جاڭاجىلدىق فەستيۆال ۇيىمداستىرىلادى.
فەستيۆال باعدارلاماسىندا حالىقتىق كاراوكە، بي فلەشموبى، بايقاۋلار، سپەكتاكلدەر، ەسترادا جۇلدىزدارىنىڭ قاتىسۋىمەن جاندى مۋزىكا، حاسكيمەن فوتوسەسسيالار، شەبەرلىك سىنىپتارى مەن كورمەلەر، قالالىق مەيرامحانالار جانە كافەلەردىڭ گاسترو-كورنەرلەرى (21–31 جەلتوقسان ارالىعىندا اباي جانە «استانا» الاڭدارى ساعات 16.00- دەن 21.00-گە دەيىن، 27–31 جەلتوقسان ارالىعىندا ءار اۋداننىڭ نەگىزگى الاڭدارىندا ساعات 16.00-دەن 21.00-گە دەيىن) بولادى جانە 25 جەلتوقساندا اياز اتالار شەرۋى وتەدى.