17 قاڭتاردان باستاپ الماتى مەتروسىنىڭ جۇمىسى قايتا جانداندى. بۇل تۋرالى قالا اكىمى باقىتجان ساعىنتايەۆتىڭ توراعالىعىمەن وتكەن الماتى قالاسىنىڭ تىنىس-تىرشىلىگىن قالپىنا كەلتىرۋ جونىندەگى قالالىق شتاب وتىرىسىندا قالالىق موبيلدىلىك باسقارماسىنىڭ باسشىسى عاني مىرزاحانوۆ ايتىپ بەردى دەپ حابارلايدى almaty-akshamy.kz
بۇگىندە بارلىق 151 باعىت جانە 1600 بىرلىك جىلجىمالى قۇرام، سونىڭ ىشىندە تروللەيبۋس جانە قالا ماڭىنداعى باعىتتار ىسكە قوسىلدى. قالالىق مارشرۋتتاردىڭ جۇمىس ءتارتىبى 8.00-دەن 21.00-گە دەيىن، قالا ماڭىنداعى مارشرۋتتاردا 9.00-دەن 21.00-گە دەيىن.
سونىمەن قاتار، مەترو جۇمىسى قايتا جانداندى. جۇمىس ۋاقىتى 7.00 - دەن 21.00-گە دەيىن.
ع. مىرزاحانوۆتىڭ ايتۋىنشا، تارتىپسىزدىك كەزىندە 28 بىرلىك اۆتوبۋس زاقىمدالعان (26 بىرلىك – «الماتىەلەكتروترانس» ج ش س، 1 بىرلىك – «اۆتوالماترانس» ج ش س، 1 بىرلىك – «اۆتوترانسگاز» ج ش س). بۇگىنگى تاڭدا 16 اۆتوبۋس تولىق قالپىنا كەلتىرىلدى، قالعان 12 اۆتوبۋس قوسالقى بولشەكتەردىڭ (شىنىلاردىڭ) قاڭتار ايىنىڭ سوڭىنا دەيىن جەتكىزىلۋىنە قاراي قالپىنا كەلتىرىلەدى.
اۋەجاي مەن تەمىرجول ۆوكزالدارى شتاتتىق رەجيمدە جۇمىس ىستەيدى.
15 قاڭتاردان باستاپ قالاارالىق تاسىمالدار جارتىلاي جاڭارتىلدى (تالدىقورعان، تاراز، شىمكەنت قالالارى).
قالالىق موبيلدىلىك باسقارماسىنىڭ باسشىسى قالانىڭ جول ينفراقۇرىلىمىن قالپىنا كەلتىرۋ جۇمىستارى تۋرالى ايتىپ بەردى.
قالانىڭ كوشە-جول جەلىسىن زەرتتەۋ ناتيجەلەرى بويىنشا 1050 شارشى مەتر جول جابىنىنىڭ، 410 مەتر ۇيىلگەن جيەكتەردىڭ، 98 دانا بۇزىلعان مەتالل تورلار انىقتالدى. جوندەۋ-قالپىنا كەلتىرۋ جۇمىستارى اياقتالدى.
2025 ش.م. تروتۋارلارداعى تاس توسەمدەر بولشەكتەلدى، تروتۋارلاردىڭ جابىنى قالپىنا كەلتىرىلدى.
ع. مىرزاحانوۆ الماتىدا 46 باعدارشام نىسانى مەن 121 دانا جول بەلگىلەرىنىڭ (رەسپۋبليكا الاڭى، نازاربايەۆ داڭعىلى، دوستىق داڭعىلى، اباي داڭعىلى، رايىمبەك داڭعىلى، تولە بي كوشەسى، ساتپايەۆ كوشەسى، مومىش ۇلى كوشەسى) جابدىقتالۋى زاقىمدالعانىن اتاپ ءوتتى. بۇگىندە بۇل زاقىم تولىعىمەن قالپىنا كەلتىرىلدى.
سونداي-اق، اۆتوبۋس پاۆيلوندارىن قالپىنا كەلتىرۋ جۇمىستارى جۇرگىزىلۋدە: 43 اۆتوبۋس پاۆيلونى بۇلىنگەن، ونىڭ 23ء-ى تولىق قالپىنا كەلتىرىلگەن. قالعان 20 پاۆيلوندى شىنى پاكەتتەردى دايىنداۋ شاماسىنا قاراي قاڭتار ايىنىڭ سوڭىنا دەيىن جوندەۋ جوسپارلانۋدا. بۇل جۇمىستار جەكە ينۆەستورلاردىڭ («رتس» ج ش س جانە «يۋنيكوم بيزنەس» ج ش س) قاراجاتى ەسەبىنەن جۇرگىزىلەدى.
«سونداي-اق، 220 ۆەلوسيپەد پەن 21 الماتىبايك ۆەلوستانسياسى بۇزىلعان. سونىمەن قاتار، 170 ۆەلوسيپەد ۇرلانعان. قازىرگى ۋاقىتتا ات-جۇيەسىن قالپىنا كەلتىرۋ جانە تەكسەرۋ جۇمىستارى جۇرگىزىلۋدە. حالىققا قىزمەت كورسەتۋدى جاڭارتۋ 20 قاڭتارعا دەيىن جوسپارلانعان»، - دەدى ع. مىرزاحانوۆ.
ول زاقىمدالعان ۆەلوسيپەدتەردى جوندەۋ جانە ۇرلانعان ۆەلوسيپەدتەردى قالپىنا كەلتىرۋ ءۇشىن قوسىمشا قاراجات (370 ملن تەڭگە) ءبولۋ ماسەلەسى پىسىقتالىپ جاتقانىن اتاپ ءوتتى).
اقىلى اۆتوتۇراقتاردىڭ قىزمەتىنە كەلەتىن بولساق، ول توتەنشە جاعداي رەجيمى جويىلعانعا دەيىن ۋاقىتشا توقتاتىلدى.
24 بىرلىك پاركومات بۇلىنگەن. بۇگىنگى كۇنى اتالعان پاركوماتتار جوندەۋگە الىندى. جوندەۋ-قالپىنا كەلتىرۋ جۇمىستارىن پاركوماتتارعا ارنالعان جيناقتاۋىشتاردىڭ جەتكىزىلۋىنە قاراي قاڭتار ايىنىڭ سوڭىنا دەيىن اياقتاۋ جوسپارلانۋدا.
قالالىق موبيلدىلىك باسقارماسىنىڭ باسشىسى سونداي-اق جول ايىرىقتارىندا، تەسىكتەردە جانە مەترودا قۇرىلىس-مونتاجداۋ جۇمىستارى قايتا باستالعانىن حابارلادى. كەستەلەردەن ارتتا قالۋشىلىق بايقالمايدى.