«سالەم» بازارىندا بىرنەشە كونتەينەر وتقا وراندى
الماتىداعى «باراحولكا» بازارىنان ءورت شىقتى، دەپ حابارلايدى Almaty-akshamy.kz.
الماتى قالالىق توتەنشە جاعدايلار دەپارتامەنتىنىڭ مالىمەتىنشە، 6 اقپان كۇنى ساعات 21:09 شاماسىندا ءورت سوندىرۋشىلەر جەتىسۋ اۋدانى، بوكەيحانوۆ كوشەسى، 508ا مەكەنجايىنا شاقىرتۋعا شىقتى.
«العاشقى ءورت ءسوندىرۋ ەسەپتەرى وقيعا ورنىنا 3 مينۋتتا كەلدى. ولار «سالەم» بازارىندا بىرنەشە كونتەينەردىڭ وتقا ورانعانىن انىقتادى. الدىن الا اقپارات بويىنشا، ءورت 120 شارشى مەتر اۋماقتى شارپىعان. وقيعا ورنىندا ەكى ءورت ءسوندىرۋ ۋچاسكەلەرى قۇرىلدى»، - دەپ حابارلادى ۆەدومستۆودان.
ساعات 21:42-دە ءورت وقشاۋلاندى. وقيعادان زارداپ شەككەندەر جوق. ءورتتىڭ شىعۋ سەبەبى انىقتالىپ جاتىر.