تەليەۆيزيالىق نۇسقاسى «الماتى» تەلەارناسىنان كورسەتىلەدى
«باقىت دەگەن – سەنىڭ بالا كۇندەرىڭ». الماتىدا وسىنداي اتاۋمەن وتكەن ۆوكالدىق فەستيۆال اياقتالدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ءبىر ايعا سوزىلعان رەسپۋبليكالىق بايقاۋ بيىل 6-رەت وتكىزىلىپ وتىر. 6 مەن 16 جاس ارالىعىنداعى بالالار قاتىسقان فەستيۆالدە ەرەكشە كوزگە تۇسكەندەر بۇگىن گالا-كونسەرتتە وتاندىق ەسترادا جۇلدىزدارىمەن جۇپ بولىپ ونەر كورسەتتى. شارا «بالالار جىلى» اياسىندا ۇيىمداستىرىلدى.
امەلي سوحەسكايا – بايقاۋدىڭ ەڭ جاس قاتىسۋشىسى. 6 جاستاعى ءبۇلدىرشىن بۇگىنگى دودادا تانىمال شەتەل جۇلدىزىنىڭ ءانىن ورىنداپ، توپ جاردى. بۇل – ساحناداعى العاشقى قادامى.
«مەنىڭ بۇگىنگى ونەرىم سىزدەرگە ۇنادى دەگەن ويدامىن. تۋىندىنى ساحناعا الىپ شىعۋ ءۇشىن ءبىز ۇستازىمىزبەن ۇزاق دايىندالدىق»، – دەدى بايقاۋعا قاتىسۋشى امەلي سوحەسكايا.
ۆوكالدىق بايقاۋ – تالابى تاۋداي تالاناتتى بالالاردىڭ جولىن اشۋعا مۇمكىندىك. جىل سايىن ءداستۇرلى تۇردە وتەتىن جوباعا قىزىعۋشىلىق تانىتقاندار كوبەيىپ كەلەدى. بيىلدىڭ وزىندە ەلىمىزدىڭ ءار ايماعىنان 7 مىڭنان استام ءوتىنىم كەلىپ ءتۇسىپتى. ىرىكتەۋدەن 11 بالا ءوتتى. كاستينگ ونلاين ۇيىمداستىرىلدى.
«تالدىقورعان قالاسىنان كەلدىم. مەنىڭ ۆوكالعا قاتىسىپ جۇرگەنىمە 4 جىل بولدى. بۇگىنگى كونسەرتتە سالتانات باقايەۆامەن بىرگە ءان شىرقايمىن»، – دەدى بايقاۋعا قاتىسۋشى اياۋلىم يمانگەلدى.
«بۇگىن مەنىڭ ارمانىم ورىندالدى. مەن تانىمال قازاقستاندىق جۇلدىزبەن ءان ايتامىن. ول – ايدانا مەدەنوۆا. ءبىز «مەنىمەن بيلە» اتتى ءاندى ايتامىز»، – دەدى بايقاۋعا قاتىسۋشى ايبيكە ساتبايەۆا.
ۇيىمداستىرۋشىلاردىڭ ايتۋىنشا، بايقاۋدىڭ باسقالاردان ەرەكشەلىگى رەاليتي شوۋ فورماتىندا وتكىزىلدى. ەلىمىزدىڭ ءار وڭىرىنەن جينالعان قاتىسۋشىلار 1 اي الماتىدا بولىپ، قازاقستاندىق انشىلەردەن ساباق الىپ، كوڭىلدى ۋاقىت وتكىزگەن.
«مەن جىل سايىن بايقاۋدا ءادىل قازىلار القاسىندا مۇشەلىك ەتەمىن. ءبىر بايقاعانىم جىل ساناپ بالالاردىڭ ءان ايتۋ دەڭگەيى ءوسىپ كەلەدى. ولاردىڭ اراسىندا جۇلدىزى جانعان، بولاشاقتا ءۇمىت كۇتتىرەتىن دارىندى بالالار دا بار»، – دەدى ءانشى انەل ءارىنوۆا.
ايتا كەتەيىك، جوبانىڭ اقپاراتتىق دەمەۋشىسى – «الماتى» تەلەارناسى. ونەر جۇلدىزدارىنىڭ قاتىسۋىمەن وتكەن ونەر دوداسىنىڭ تەليەۆيزيالىق نۇسقاسى ارنادان كورسەتىلەدى.