مەموراندۋم كۇشىنە ەندى، ول قول قويىلعان كۇننەن باستاپ 12 اي قولدانىستا بولادى.
قارجى نارىعىن رەتتەۋ جانە دامىتۋ اگەنتتىگى (قنردا)، الماتى اكىمدىگى، بانك ومبۋدسمەنى، بانكتەر جانە قوعامدىق بىرلەستىكتەر اراسىندا يپوتەكالىق قارىزدار بويىنشا جالعىز تۇرعىن ءۇيدى ساتۋدى جانە ودان حالىقتىڭ الەۋمەتتىك وسال توپتارىن شىعارۋدى توقتاتا تۇراتىن ءوزارا تۇسىنىستىك پەن ىنتىماقتاستىق تۋرالى مەموراندۋمعا قول قويىلدى، دەپ حابارلايدى Almaty-akshamy.kz Tengrinews.kz-كە سىلتەمە جاساپ.
مەموراندۋمدى ازىرلەۋ 2020 جىلدىڭ ماۋسىمىندا باستالعانى اتاپ ءوتىلدى.
«مەموراندۋمنىڭ ماقساتى تاراپتاردىڭ پروبلەمالىق بەرەشەكتى، ونىڭ ىشىندە يپوتەكالىق تۇرعىن ءۇي قارىزدارىن/يپوتەكالىق قارىزداردى قايتا قارجىلاندىرۋ باعدارلاماسىنىڭ شارتتارى بويىنشا قايتا قارجىلاندىرىلعان بەرەشەكتى رەتتەۋ جونىندە شارالار قابىلداۋى ارقىلى ءحاوت-قا جاتاتىن قارىز الۋشىلاردىڭ (تەڭ قارىز الۋشىلاردىڭ، كەپىلگەرلەردىڭ، كەپىل بەرۋشىلەردىڭ) قۇقىقتارىن قورعاۋ»، - دەلىنگەن قنردا حابارلاماسىندا.
مەموراندۋمعا سايكەس، قيىندىقتارى بار قارىزدى رەتتەۋ كەزەڭىندە بانكتەر مىنانى توقتاتا تۇرادى: سوت ءىسىن جۇرگىزۋ، قارىزدى ءوندىرىپ الۋ ءۇشىن اتقارۋشىلىق جازبانى جاساۋعا نوتاريۋسقا جۇگىنۋ، بانك بالانسىنا قابىلدانعان جالعىز تۇرعىن ءۇيدى ساتۋ، قارىز الۋشىلاردى تۇرعىن ۇيدەن شىعارۋ، ونىڭ ىشىندە بانكتىڭ بالانسىنداعى وسى تۇرعىن ءۇيدىڭ بۇرىنعى يەلەرىن شىعارۋ.
ايتا كەتەيىك، بۇل مىندەتتى مەموراندۋم ەمەس.
«تاراپتاردىڭ ءارقايسىسى مەموراندۋمنىڭ ىزگى نيەت اكتىسى ەكەنىن راستايدى جانە تاراپتاردىڭ بەلگىلەنگەن ماقساتتارعا قول جەتكىزۋ ءۇشىن ادال ىنتىماقتاسۋعا دەگەن ءوزارا نيەتىن بىلدىرەدى جانە ازاماتتىق قۇقىقتار مەن مىندەتتەردى بەلگىلەيتىن شارت نەمەسە وزگە قۇجات رەتىندە تۇسىندىرىلمەيدى»، - دەلىنگەن قۇجاتتا.
مەموراندۋم كۇشىنە ەندى، ول قول قويىلعان كۇننەن باستاپ 12 اي قولدانىستا بولادى.
بۇعان دەيىن الماتىدا بولعان اتىستان سوڭ قارىز الۋشىلاردى ۇيىنەن شىعارۋ ماسەلەسى بەلسەندى تالقىلانا باستاعان بولاتىن. ەسكە سالايىق، 20 قىركۇيەكتە الماتىنىڭ اقبۇلاق شاعىناۋدانىندا ەر ادام بەس ادامدى اتىپ ءولتىردى، ولاردىڭ اراسىندا پوليسەيلەر، سوت ورىنداۋشىسى جانە قاراپايىم تۇرعىندار بار. ول ۇيدەن شىعارۋ تۋرالى سوت شەشىمىن ورىنداۋعا كەلگەن ادامدارعا وق اتقان.