ءبىر جىل بۇرىن بولعان قىلمىسقا قاتىستى سوت شەشىمى شىقتى
الماتىدا وتكەن جىلدىڭ قازان ايىندا بانك توناعان ءۇش ادام سوتتالدى، دەپ حابارلايدى Almaty-akshamy.kz «حابار 24»-كە سىلتەمە جاساپ.
المالى اۋداندىق سوتىنىڭ ماۋسىمداعى ۇكىمىن قالالىق سوتتىڭ اپپەلياسيالىق كوميسسياسى وزگەرىسسىز قالدىردى. رەسمي مالىمەتتەر بويىنشا، قاراقشىلار بانككە 2 394 830 تەڭگە كولەمىندە ماتەريالدىق زالال كەلتىرگەن. ناتيجەسىندە سوت ابىلكارىموۆ پەن ستەپانوۆتى قىلمىستىق كودەكستىڭ 192-بابى 3-بولىگىنىڭ 2-تارماعى «قاراقشىلىق» ءىسى بويىنشا كىنالى دەپ تانىپ، 7 جىلعا باس بوستاندىعىنان ايىردى.
ال ءومىرزاقوۆقا «قاراقشىلىق» بابىمەن قاتار «الاياقتىق» بويىنشا دا ايىپ تاعىلدى. ول 2019 جىلى ريەلتور بولىپ، پاتەر ساتىپ الماق بولعان 7 ادامنىڭ قاراجاتىن جىمقىرعان. شىعىننىڭ جالپى كولەمى 60 ميلليون تەڭگەدەن اسادى. سوت ءومىرزاقوۆتى 8 جىلعا باس بوستاندىعىنان ايىردى.