الماتى پوليسياسى بوزبالانى قاعىپ كەتكەن جۇك كولىگىنىڭ جۇرگىزۋشىسىن ۇستادى. بالا وقيعا ورنىندا كوز جۇمدى، – دەپ حابارلايدى almaty-akshamy.kz Polisia.kz سىلتەمە جاساپ.
قايعىلى وقيعا قالقامان شاعىن اۋدانىندا بولعان. جاياۋ جۇرگىنشىلەر وتكەلىندە گاز-53 كولىگىن باسقارعان ازامات ءجاسوسپىرىمدى قاعىپ كەتتى.
– ءبىر تاۋلىكتەن كەيىن جۇرگىزۋشى الماتى وبلىسىندا الكوگولدىك جانە ەسىرتكىلىك ماساڭ كۇيدە ۇستالدى. كولىك جاقىن ماڭداعى كوشەدەن تابىلعان، ول جول اپاتىنان كەيىن ونى تاستاپ، جاياۋ قاشىپ كەتكەن. تەكسەرۋ بارىسىندا جۇرگىزۋشى 2020 جىلى 7 جىلعا كولىك قۇرالىن باسقارۋ قۇقىعىنان ايىرىلعانى بەلگىلى بولدى. ءقازىر ول قاماۋدا. اتالعان دەرەك ق ر قك-نىڭ 345-بابى 3-بولىگى جانە ق ر قك-نىڭ 347-بابى بويىنشا تەرگەۋ امالدارى جۇرگىزىلىپ جاتىر، – دەدى الماتى قالاسى پد جپقب ىزدەستىرۋ ءبولىمىنىڭ باستىعى قايسار تولەبەكوۆ.
ق ر قك-نىڭ 201-بابىنا سايكەس وزگە اقپارات تەرگەۋ مۇددەسىنە وراي جاريا ەتىلمەيدى. ق ر كونستيتۋسياسىنىڭ 77-بابى 3ء-بولىمى 1-تارماعى، ق ر قك-نىڭ 19-بابى 1-تارماعىنا ساي كەز كەلگەن ازامات سوت شەشىمى زاڭدى كۇشىنە ەنگەنگە دەيىن كىناسىز دەپ سانالادى.