الماتىدا بالالاردىڭ سپورت سەكسيالارى مەن شىعارماشىلىق ۇيىرمەلەرىنە قوسىمشا اقشا بولىنەدى

قالا اكىمى 4،5 ملرد تەڭگە قاراستىرىپ وتىرعانىن ايتتى. 

الماتى بالالارى بوس ۋاقىتىن ءتيىمدى پايدالانىپ كەلەدى. مەملەكەت باسشىسىنىڭ تاپسىرماسى بويىنشا الماتىدا 44 مىڭنان استام بالا 594 سپورت سەكسياسىنا تەگىن بارادى. ءبىر ۋاقىتتا 56 مىڭ بالا 1 179 شىعارماشىلىق ۇيىرمەگە قاتىسادى. بۇل تۋرالى الماتى اكىمى ەربولات دوسايەۆ ءماسليحات وتىرىسى بارىسىندا ايتتى، دەپ حابارلايدى Almaty-akshamy.kz. 

«بۇل باستامانى الماتىلىقتار جاقسى باعالاپ وتىرعانىن ايتا كەتۋ قاجەت. «وتىنىشتەر لەگى» وتە كوپ. بۇل 2،6 ملرد تەڭگە سوماسىنا كرەديتتىك بەرەشەكتىڭ قالىپتاسۋىنا سەبەپ بولدى (1،7 ملرد تگ. – سپورت،900 ملن. تگ. - مادەنيەت). وسىعان بايلانىستى، ەل پرەزيدەنتىنىڭ تاپسىرماسىن ورىنداۋ ماقساتىندا ءبىز قوسىمشا 4،5 ملرد تەڭگە قاراستىرىپ وتىرمىز. ونىڭ 3 ملرد تەڭگەسى سپورت سەكسيالارىنا جانە 1،5 ملرد تەڭگەسى شىعارماشىلىق ۇيىرمەلەرگە بولىنەدى»، - دەدى قالا اكىمى. 

بۇل رەتتە، ARTSPORTEDU.KZ باعدارلاماسىنىڭ وزىندە بالالاردىڭ، ءونىم بەرۋشىلەردىڭ دەرەكتەرىن تەكسەرۋگە، مەملەكەتتىك ورگانداردىڭ دەرەكتەر بازاسىمەن تولىق ينتەگراسيانىڭ  بولماۋىنا بايلانىستى پروبلەمالار بار.