الماتىدا مەملەكەتتىك شىعارماشىلىق جانە سپورتتىق تاپسىرىس اياسىندا بالالاردى تەگىن ۇيىرمەلەر مەن سپورت سەكسيالارىنا قابىلداۋ ءۇشىن اتا-انالاردان وتىنىشتەر قابىلداۋ باستالدى.
جۇيەگە جۇكتەمەنى ازايتۋ ماقساتىندا جازبا قالانىڭ اۋداندارى بويىنشا كەزەڭ-كەزەڭىمەن اشىلادى:
- 30 قىركۇيەك، 11:00 – اۋەزوۆ اۋدانى؛
- 30 قىركۇيەك، 18:00 – مەدەۋ اۋدانى؛
- 1 قازان، 11:00 – جەتىسۋ اۋدانى؛
- 1 قازان، 15:00 – الاتاۋ اۋدانى؛
- 2 قازان، 15:00 – تۇركسىب اۋدانى.
ۇيىمداستىرۋشىلار ورىن سانى شەكتەۋلى ەكەنىن جانە ول بولىنگەن بيۋدجەت كولەمىنە سايكەس ايقىندالاتىنىن اتاپ ءوتتى.
اتا-انالارعا جازىلۋ ەرەجەلەرىمەن مۇقيات تانىسۋ، جۇيەنى ءوز بەتىنشە پايدالانۋ جانە ەلەكتروندىق سيفرلىق قولتاڭبا (ەسق) مەن جەكە كابينەتكە كىرۋدى ءۇشىنشى تۇلعالارعا بەرمەۋ قاتاڭ ەسكەرتىلەدى. ەرەجەلەردى بۇزعان جاعدايدا زاڭناماعا سايكەس جاۋاپكەرشىلىك قاراستىرىلعان.
قۇزىرلى ورگاندار پوليسيا دەپارتامەنتىمەن بىرلەسىپ، ءراسىمنىڭ اشىقتىعى مەن زاڭدىلىعىن قامتاماسىز ەتۋگە باعىتتالعان الدىن الۋ شارالارىن جۇرگىزۋدە.
قالانىڭ باسقا اۋداندارى بويىنشا جازىلۋ مەرزىمى تۋرالى اقپارات قوسىمشا حابارلانادى.