سوت ۇكىمىمەن بۇرىنعى باسشى قىزمەت بابىن اسىرا پايدالانعانى ءۇشىن كىنالى دەپ تانىلدى.
ماۋسىمنىڭ 7ء-سى كۇنى الماتى قالاسى مەدەۋ اۋدانىنىڭ N2 اۋداندىق سوتى «بالبۇلاق» بالالاردى وڭالتۋ ورتالىعىنىڭ ەكس-ديرەكتورىنا قاتىستى قىلمىستىق ءىس بويىنشا ۇكىم شىعاردى، دەپ حابارلايدى Almaty-akshamy.kz قازاقپارات cايتىنا سىلتەمە جاساپ.
سوت انىقتاعانداي، 2020 جىلدىڭ 30 جەلتوقسانىندا بۇرىنعى ديرەكتوردىڭ توراعالىعىمەن وتكەن كوميسسيا وتىرىسىندا وسى مەكەمەنىڭ 22 قىزمەتكەرىنە سىياقى رەتىندە 2 331 169 تەڭگە كولەمىندە قاراجات ءبولۋ تۋرالى شەشىم قابىلداندى.
«2020 جىلدىڭ 31 جەلتوقسانىندا ا. ەسەپشىلەرىنە جالپى سوماسى 939 000 تەڭگەنى قۇرايتىن سىياقىنى جيناپ، وزىنە بەرۋدى تاپسىردى. وسىلايشا، سوت ا.-نىڭ ءوز پايداسى ءۇشىن قىزمەتتىك وكىلەتتىگىن اسىرا پايدالانعانى، بۇل مەملەكەتتىڭ زاڭمەن قورعالاتىن قۇقىقتارى مەن مۇددەلەرىنە ەلەۋلى زيان كەلتىرۋگە اكەپ سوقتىرعانىن انىقتادى، ياعني ول قازاقستان رەسپۋبليكاسى قىلمىستىق كودەكسىنىڭ 361-بابىنىڭ 1-بولىگى بويىنشا قىلمىستىق قۇقىق بۇزۋشىلىق جاسادى»، - دەپ حابارلادى سوتتىڭ باسپا ءسوز قىزمەتى.
پروكۋرور وعان 1000 اەك كولەمىندە ايىپپۇل سالۋدى سۇرادى (2 917 000 تەڭگە).
سوتتا ءتۇسىندىرىپ وتىلگەندەي، قىلمىستىق كودەكستىڭ 361-بابىنىڭ 1-بولىگىنىڭ سانكسياسى 2000 اەك-كە دەيىن ايىپپۇل ءتۇرىن نەمەسە سول مولشەردە تۇزەۋ جۇمىستارىنا جەگۋدى نەمەسە 600 ساعاتقا دەيىن قوعامدىق جۇمىستارعا تارتۋ تۇرىندە جازالاۋدى كوزدەيدى. نە بولماسا ەكى جىلعا دەيىن باس بوستاندىعىن شەكتەۋ نەمەسە مۇلكىن تاركىلەپ، بەلگىلى ءبىر لاۋازىمداردى اتقارۋ قۇقىعىنان ءومىر بويىنا ايىرا وتىرىپ، سول مەرزىمگە باس بوستاندىعىنان ايىرۋدى قاراستىرادى.
سوت ۇكىمىمەن بۇرىنعى باسشى قىزمەت بابىن اسىرا پايدالانعانى ءۇشىن كىنالى دەپ تانىلدى.
«سوت سوتتالۋشى كەلتىرىلگەن زالالدى تولىق كولەمدە وتەگەنىن، ءبىرىنشى رەت قىلمىستىق جاۋاپكەرشىلىككە تارتىلعانىن، ءوزىنىڭ كىناسىن تولىق مويىنداپ، جاساعان ىسىنە وكىنگەنىن ەسكەردى. سونىمەن بىرگە، اۋىرلاتاتىن ءمان-جايلار كەلتىرىلگەن جوق. وسىعان بايلانىستى، ا.-عا مەملەكەتتىك قىزمەتتە، قارجى ۇيىمدارىندا، مەملەكەتتىك ۇيىمداردا جانە كۆازيمەملەكەتتىك سەكتور سۋبەكتىلەرىندە لاۋازىمداردى اتقارۋ قۇقىعىنان ءومىر بويىنا ايىرا وتىرىپ، ءبىر جىل مەرزىمگە باس بوستاندىعىن شەكتەۋ جازاسى تاعايىندالدى»،- دەپ حابارلادى سوتتان.
سوت ۇكىمى زاڭدى كۇشىنە ەنگەن جوق.